— वेस्ट ह्यामले इंग्लिस प्रिमियर लिगमा आइतबार यो सिजनको दोस्रो जित आत्मसात् गरेको छ । लन्डन स्टेडियममा एक गोलले पछाडि रहेको स्थितिबाट वेस्ट ह्यामले न्युकासल युनाइटेडमाथि ३–१ को पुनरागमन जित रचेको हो । नयाँ प्रशिक्षकका रूपमा नुनो स्पिरिटो सान्टु आएयता वेस्ट ह्यामको यो पहिलो जित हो ।
यस्तै फेब्रुअरीयता वेस्ट ह्याम आफ्नो घरेलु मैदानमा विजयी रहेको पनि यो पहिलो पटक हो । यो जितपछि वेस्ट ह्यामको दस खेलबाट सात अंक भएको छ र अझै १८ औं स्थानमा रहेर रेलिगेसन क्षेत्रमा छ । न्युकासल भने १२ अंकमा १३ औं स्थानमा रहेको छ ।
न्युकासलले चौथो मिनेटमा ज्याकोब मर्फीको गोलले अग्रता लिएको थियो । लुकास पाक्वेटाले ३५ औं मिनेटमा वेस्ट ह्यामका लागि बराबरी गोल फर्काए । पहिलो हाफको इन्ज्युरी समयमा स्भेन बोटमनले आत्मघाती गोल गरेपछि वेस्ट ह्याम पहिलो पटक खेलमा अगाडि रह्यो । टोमस सोचेकले खेलको अन्त्यतिर वेस्ट ह्यामका लागि तेस्रो गोल थपे ।
सेल्टा भिगोको जित
म्याड्रिड– रोमन गोन्जालेजले दोस्रो हाफको इन्ज्युरी समयको पहिलो मिनेटमा गरेको निर्णायक गोलको मद्दतले सेल्टा भिगोले स्पेनी ला लिगामा आइतबार दस खेलाडीमा सीमित लेभान्टेलाई २–१ ले पराजित गरेको छ । ओस्कार मिग्वेजाले पहिलो हाफमा गोल गरेपछि सेल्टा भिगाले सुरुआती अग्रता लिएको थियो ।
लेभान्टेका लागि केरभनी एरिगाले दोस्रो हाफमा गोल गरेपछि खेल बराबरीमा पुगेको थियो । लेभान्टेले २९ औं मिनेटमा उनाई भन्सेन्डरलाई रातो कार्डमा गुमाएको थियो र यसले सेल्टा भिगोलाई केही सजिलो बनाएको थियो । यो जितपछि सेल्टा भिगोको १३ अंक भएको छ र ११ औं स्थानमा उक्लेको छ । लेभान्टे भने ९ अंकमा १७ औं स्थानमा छ ।
इन्टर दोस्रो स्थानमा
मिलान– इन्टर मिलानले इटालीको सिरी ‘ए’ आइतबार हेलास भेरोनालाई २–१ ले पराजित गर्दै अंक तालिकाको दोस्रो स्थानमा उक्लेको छ । पिटोर जिलिन्स्कीको गोलले इन्टरले १६ औं मिनेटमा अग्रता लिएपछि घरेलु टिमका लागि गिओभानेले ४१ औं मिनेटमा बराबरी गोल फर्काए ।
खेल बराबरीतर्फ अग्रसर भइरहेका बेला मार्टिन फ्रेसेले दोस्रो हाफको इन्ज्युरी समयमा आत्मघाती गोल गरे र यससँगै इन्टर विजयी रह्यो र उसको १० खेलबाट २१ अंक भएको छ । यो शीर्ष स्थानमा रहेको नेपोलीसँग एकै अंकको मात्र दूरी हो । डिफेन्डिङ च्याम्पियन नेपोलीको २१ अंक रहेको छ ।
पीएसजी पछ्याउँदै मार्से
पेरिस– एन्जेल जोमेजले गरेको एक मात्र गोलको मद्दतले फ्रान्सेली लिग–वानमा मार्सेले आइतबार एक्सेरलाई १–० ले हराएको छ र अंक तालिकाको दोस्रो स्थानमा पुगेको छ । यो जितपछि मार्सेको ११ खेलबाट २२ अंक भएको छ र यो शीर्षमा रहेको पेरिस सेन्ट जर्मेन (पीएसजी) सँग दुई अंकको अन्तर हो ।
पीएसजीको ११ खेलबाट २४ अंक रहेको छ । मोनाको भने २० अंकमा तेस्रो स्थानमा छ । गोमेजले ३० औं मिनेटमा निर्णायक गोल गर्न सफल रहे । खेलको अन्त्यमा दुवै खेलाडी १०–१० खेलाडीमा सीमित रहे । मार्सेका युलिसे गार्सिया र अक्सेरका सिनाली डाइमन्डे रातो कार्डमा मैदान छाड्न बाध्य रहे ।
