— प्रधानमन्त्री सुशीला कार्कीले विभिन्न समूहमा विभाजित जेन-जीहरूले वर्तमान समयको संवेदनशीलता र अन्तरिम सरकारको सीमा बुझ्नुपर्ने बताएकी छन् । कोही जेन-जी बरालिएका र कोही उग्र रहेको बताउँदै उनले संयम भएर अगाडि बढ्नुपर्ने बताएकी हुन् ।
बालुवाटारमा सातै प्रदेशका मुख्यमन्त्रीहरूसँग आइतबार छलफलका क्रममा प्रधानमन्त्री कार्कीले उक्त धारणा राखेकी हुन् । जेन-जीहरूका धारणा विभिन्न तहबाट आइरहेको उनको भनाइ थियो ।
प्रधानमन्त्री सचिवालयले दिएको जानकारी अनुसार जेन-जी आन्दोलनमा सहभागीहरू कोही ठिकै भएको तर कोही भने मनोमानी गर्दै हिँडेको भन्ने कार्कीको भनाइ थियो । 'कतिपय जेन-जी यहीँ (प्रधानमन्त्री कार्यालय) आएर चर्का कुरा गरेर जान्छन् । कतिपय यहाँ भित्र ठिकठाक हुन्छन्, बाहिर गएर मनोमानी बोल्छन् । जेसुकै भए पनि ती सबै हाम्रा छोराछोरी हुन् । सिक्दै छन् । कतिपय त निकै नै परिपक्व कुरा पनि गर्छन् । हामीलेभन्दा धेरै कुरा उनीहरूले जानेका छन्,' कार्कीले भनेकी थिइन्, 'जेन-जीहरूलाई पनि पार्टी खोलेर चुनावमा सहभागी होऊ र आफ्ना एजेन्डा जनताबाट अनुमोदन गराऊ भनेका छौँ । कोही-कोही बरालिएका छन्, कोही उग्र पनि छन् । उनीहरूले यो समयको संवेदनशीलता र अन्तरिम सरकारका सीमा बुझ्नुपर्छ ।'
वर्तमान सरकारमा सहभागी कसैको पनि खराब नियत नरहेको पनि प्रधानमन्त्रीको भनाइ थियो । 'कतिपय कुरा लेख्दा, बोल्दा तलमाथि होला । तर, हाम्रो नियत खराब छैन । कसैले आशंका पाल्नुपर्ने कारण छैन । हामी तपाईँहरूसँग सहकार्य गरेर नै अघि बढ्ने हो । संविधानले दिएको परिधिभित्रै रहेर काम गर्ने हो । संविधानले बनाएका संरचनाको सम्मान गर्नु नै पर्छ,' प्रधानमन्त्री कार्कीले भनेकी थिइन् ।
मुलुकमा स्थायित्वका लागि जनताबाट निर्वाचित सरकार चाहिने र निर्वाचनका लागि राजनीतिक दल अपरिहार्य रहेको प्रधानमन्त्री कार्कीको भनाइ थियो । 'स्थायित्वका लागि निर्वाचित सरकार नै चाहिन्छ । निर्वाचन र राजनीतिक दल एकअर्काका परिपूरक हुन् । राजनीतिक दल नभई यो व्यवस्था चल्दैन । त्यसैले स्वतन्त्र विज्ञ भनेर नाम चलेका व्यक्तिहरू पनि चुनाव लड्न दल खोल्दै छन्,' उनले भनेकी थिइन् ।
प्रधानमन्त्री कार्कीले वर्तमान सरकारको मुख्य प्राथमिकता निर्वाचनको वातावरण बनाउनु रहेको बताएकी थिइन् । 'प्रहरीका लागि तत्काल आवश्यक गाडी खरिदको प्रक्रिया अघि बढिसकेको छ । छिमेकी मुलुकहरूले पनि सवारी साधन उपलब्ध गराउँदै छन् । केही मित्रराष्ट्रले आर्थिक सहयोग गर्ने वचन दिएका छन् ।
आन्दोलनमा क्षतिग्रस्त भएका प्रहरीका ९० प्रतिशत संरचना स्थानीय जनताले नै बनाइदिएका छन् । यसले प्रहरीको मनोबल उकास्न र जनतासँगको सम्बन्ध थप कसिलो बनाउन मद्दत गरेको छ । यो निकै अर्थपूर्ण र संसारका लागि उदाहरणीय पनि छ,' उनको भनाइ थियो, 'अहिलेभन्दा निकै प्रतिकूल अवस्थामा पनि चुनाव भएको छ । जेन-जीहरूले नै पनि चुनाव हुनुपर्छ र अहिलेको अवस्थामै गर्न सकिन्छ भनेका छन् । दलहरूसँगको संवादले अझै बढी चुनावका पक्षमा वातावरण बनेको महसुस भएको छ ।'
भदौ २४ मा प्रहरीबाट लुटिएका र हराएका हतियार फेला पर्दै गएको पनि प्रधानमन्त्रीको भनाइ थियो । 'प्राप्त हुन बाँकी रहेका हतियारको पनि लोकेसन पत्ता लागिसकेको छ । भागेका कैदी पनि फर्किँदै छन्,' प्रधानमन्त्रीको भनाइ थियो, 'सुरक्षित वातावरण बन्छ भन्नेमा ढुक्क भए हुन्छ । यस कार्यका लागि प्रदेशले पनि भूमिका खेल्नुपर्छ, स्थानीय सरकारले पनि हातेमालो गर्नुपर्छ । हामी तीनै तहका सरकारसँग समन्वय गरेर नै अघि बढ्छौँ । अबको छलफल स्थानीय सरकारका प्रतिनिधिहरूसँग गर्दै छौँ ।'
