— अन्तरिम सरकारकी प्रधानमन्त्री सुशीला कार्कीले आफू दलहरूलाई निषेध गरेर नभई साथै लिएर र उनीहरूको उत्साहपूर्वक सहभागिता गराएर २१ फागुनमा निर्वाचन सम्पन्न गर्दै सत्ता हस्तान्तरण गर्ने पक्षमा रहेको बताएकी छन् ।


शुक्रबार पत्रकारहरूसँग कुरा गर्दै प्रधानमन्त्री कार्कीले दलहरूलाई निषेध गर्ने वा उनीहरू विहीन अवस्था बनाउने भन्दा निर्वाचन गराउनेतिर केन्द्रित भएको र सुशासन कायम गर्ने प्राथमिकता राखेर काम गरिरहेको तर्क गर्दै सबैलाई सहयोग गर्न अपिल पनि गरिन् ।

‘दलहरूलाई निषेध गर्ने कुनै नियत छैन । सुरुकै दिनदेखि दलहरूसँग सरकारले विभिन्न माध्यममा कुरा गरेको हो । सुरुमा दलसँग कुरा गर्दा जेन–जीको आक्रोश सामना गर्नुपर्थ्यो । हाम्रा हत्यारालाई ल्याउने भन्ने नारा पनि मैले खेपेको छु,’ कार्कीले भनिन् ‘यही कारण राष्ट्रपतिलाई अघि सारेर दलहरूसँग छलफल गरियो अनि आफैं पनि दलसहित सर्वपक्षीय छलफल बोलाएर गरेको छु। ’

उनले सरकारका पनि आफ्नै अप्ठ्यारा रहेको भनी सुनाइन् । उनले आफैलाई प्रधानमन्त्री भए लगत्तै राजीनामा देऊ भनेर जेन–जीकै तर्फबाट पनि नारा लागेको प्रसंग सुनाउँदै भनिन्, ‘एमाले अयक्ष केपी शर्मा ओली र तत्कालीन गृहमन्त्री रमेश लेखकलाई नसमात्ने ? जेन–जीले आक्रोश पोखे ।’ उनले अप्ठ्यारो अवस्थामा आफूले नेतृत्व लिएको तर आलोचनाबाट नडराउने भएपनि धेरै दबाब भने खेप्नु परेको सुनाइन् ।

‘सरकारले केही गरी नै रहेको छ । निर्वाचन आयोगदेखि दलहरू र जेन–जीसँग भेटेर निरन्तर छलफल गरिरहेका छौँ,’ कार्कीले भनिन्, ‘अहिले अन्तरिम अर्को सरकार बन्नेदेखि अरू आशंकाहरु हटेका छन् । निर्वाचनतर्फ सकारात्मक वातावरण बन्दै गएको देखेको छु ।’ उनले आफूलाई पनि धेरै अप्ठ्यारो रहेको बताइन् । उनले जेन–जी, आन्दोलनका घाइते, मृतक परिवारदेखि दलसम्म सबैका कुरा सुन्नुपर्ने भएकाले सहज नभएको स्वीकार गरिन् । उनले आफू अदालतको न्यायाधीश भएर आएको तर राजनीतिको अनुभव नभएको र दलका नेताहरूको जस्तो अनुभव नभएका कारण पनि सोचेजस्तो नभएको हुन सक्ने उनले बताइन् । ‘हामी राजनीतिमा खारिएका व्यक्ति होइनौं । दलका नेताहरूले जति सिकेका छैनौ,’ उनले भनिन्, ‘आलोचना पनि आएका छन् । तर म आलोचनाले फरक पर्ने मानिस त होइन ।’


उनले २३ र २४ भदौको आन्दोलनका क्रममा धेरै क्षति भएको र देशले भयावह स्थिति भोगेका कारण नै प्रधानमन्त्री स्वीकार गरेको भन्दै कार्कीले जेन–जी, राजनीतिक दल र सरकार सबैको सहजकर्ताको भूमिका आफूले निभाउने प्रयास गरिरहेको दाबी गरेकी छन् ।

उनले जेन–जीका कति समूह छन् आफूहरुलाई थाहा नहुने अनि समूहपिच्छे नै माग र नामहरू आउँदा समस्या भइरहेको बताइन् । ‘एउटा समूह आउँछ । हाम्रो माग यही संविधान अन्तर्गतको हो भन्छ । अर्को समूह आउँछ प्रत्यक्ष कार्यकारी हुनुपर्छ भन्छ । अर्को समूह आउँछ भ्रष्टाचार र २३ गतेको आन्दोलनमा दमन गर्नेहरु कहिले पक्राउ पर्छन्,’ प्रधानमन्त्री कार्कीले सुनाइन्, ‘सरकार कामले फुर्सद नै छैन अनि धेरैथरीका जेन–जी समूहहरूको माग मिलाउने र सम्बोधन गर्ने, सम्झाउने कुरामै धेरै समय खर्चिन परेको छ । ’ उनले सरकारसँग ठूलो अपेक्षा भएको आफूले पाएको र भ्रष्टाचार नियन्त्रण गर्नुपर्ने कुरा सबैभन्दा चुनौतीपूर्ण रहेको बताइन् । उनले भ्रष्टाचारको चाङ भएको तर मुद्दाको प्रक्रिया नै लम्बेतान हुने भएकाले समय लाग्ने दाबी गरिन् । उनले मन्त्रिपरिषद् विस्तारकै कुरामा पनि धेरै हैरानी खेपेको सुनाइन् । उनले अहिले भएका मन्त्रीहरू सबैले स्वीकार गरेका व्यक्तिहरू भएको तर जेन–जीका तर्फबाट नाम पाउन कठिन भएको सुनाइन् । ‘एउटा आउँछ, एउटा नाम दिन्छ । अर्कोले रातभर आएर हुन्न भनेर जान्छ,’ कार्कीले सुनाइन्, ‘एउटा समूहले फेरl होइन त्यही मानिस चाहिन्छ भन्छ । अर्को समूह आएर फेरि स्वाट्ट काटेर जान्छ । ’

उनले यही कारण पनि मन्त्रिपरिषद् पूर्णता गर्न आफूलाई समय लागेको बताइन् । उनले श्रम, रोजगार तथा सामाजिक सुरक्षा मन्त्रीको रूपमा नाम आएका खगेन्द्र सुनारको विषयमा पनि यस्तो हुँदा गल्ती भएको स्वीकार गरिन् । उनले आफूले सामाजिक काम गर्ने भनेर चिनेको तर सिफारिसको चर्चा लगत्तै कतिवटा मुद्दा छन् भनेर अनलाइनहरूमा समाचार आउन थालेपछि पछि हटेको बताइन् ।

त्यस्तै, बब्लु गुप्ताको प्रसंगमा पनि यस्तै भएको दाबी गरिन् । जब प्रधानमन्त्रीले मन्त्रीलाई चुनाव लड्ने भनी सोधिन् पत्रकारहरूसँग प्रधानमन्त्री सुशीला कार्कीले भेट्दा शुक्रबार साँझ बालुवाटारमा मन्त्रीहरू रामेश्वर खनाल, ओमप्रकाश अर्याल, कुलमान घिसिङ, अनिल सिन्हा, जगदीश खरेल पनि थिए ।

प्रधानमन्त्री कार्कीले आफूहरू चुनाव लड्ने योजनामा नरहेको, बरु सफल चुनाव गराएर बिदा लिने भनिन् बताइन् । उनले आफ्ना मन्त्रीहरू पनि यही सोधिन् । ‘म त लड्दिनँ, तपाईंहरु चुनाव लड्ने हो र ?,’ कार्कीले मन्त्रीहरूतर्फ हेर्दै सोधिन्, ‘रामेश्वरजी लड्दिनँ भन्नुहुन्छ, कुलमानजी लड्नुहुन्छ कि ?’ निर्वाचनका लागि छिमेकी मुलुकबाट सात सय सवारी साधनको आश्वासन आएको र गैरघातक हतियार किन्ने तयारी भइरहेको जानकारी प्रधानमन्त्री कार्कीले दिइन् ।

सरकारसँग धेरै अपेक्षा हुनु स्वाभाविकै भएको र जेन–जीका कुरा सबैले सुन्नुपर्ने बताउँदै उनले कानुनी राज स्थापित गर्नबाट पछि नहट्ने प्रतिबद्धता व्यक्त गरिन् ।

राजदूत फिर्ताको निर्णय बचाउ त्यस्तै छलफलमा निर्वाचन गराउने जिम्मेवारी पाएको सरकारले किन राजदूतहरूलाई फिर्ता बोलाउने निर्णय गरेको भनी प्रश्न उठ्यो ।

जवाफमा प्रधानमन्त्री कार्कीले आर्थिक अनियमिततामा मुछिएका र सरकारको अस्तित्वमाथि नै प्रश्न उठाएपछि राजदूतहरू फिर्ता बोलाउनुपरेको भनी बचाउ गरिन् । उनले सबै देशका राजदूतहरू फिर्ता नबोलाएको र जस जसका बारेमा उजुरी र प्रश्न उठे उनीहरूको हकमा मात्र निर्णय लिएको दाबी गरिन् ।