— फ्रान्सको पेरिसस्थित लुभ्र संग्रहालयमा भएको चोरीमा संलग्नको आरोपमा थप पाँच जना पक्राउ परेका छन् । गत १९ अक्टोबरमा नेपोलियनकालीन गहना चोरी भएको घटनामा बिहीबार थप पाँच जना पक्राउ परेका हुन् ।
यसअघि गत आइतबार दुई जना पक्राउ परेका थिए । अन्तर्राष्ट्रिय सञ्चार एजेन्सी रोयटर्सका अनुसार बिहीबार थप पाँच जना पक्राउ परेसँगै यस घटनामा हालसम्म सात जना पक्राउ परेका छन् । यद्यपि पक्राउ परेकाहरू हालसम्म कुनै पनि आपराधिक घटनामा संलग्न नभएको अन्तर्राष्ट्रिय सञ्चारमाध्यम सीबीएस न्यूजले जनाएको छ ।
यस घटनामा सात जना पक्राउ परे पनि चोरी भएका गरगहनाहरू कहाँ छन् भन्ने कुनै तथ्य भेटिएको छैन । पक्राउ परेकाहरूमाथि सोधपुछ जारी छ ।
यद्यपि उनीहरूले चोरी भएको गरगहनाबारे केही थाहा नभएको बताउँदै आएका छन् । लुभ्र संग्रहालय विश्वमै सबैभन्दा धेरै सुरक्षित संग्राहलयमध्ये एक मानिन्छ । गत अक्टोबर १९ मा यो चोरी भएको थियो । अन्तर्राष्ट्रिय सञ्चारमाध्यमका अनुसार नेपोलियन तृतीयकी पत्नी युजेनी डे मोन्टिजोका लागि सन् १८५५ मा बनाइएका बहुमूल्य रत्नहरूले जडित युजेनी क्राउन (टियारा), एक हार र एउटा ब्रोचसहित नौ बहुमूल्य रत्नहरू चोरी भएका छन् । साम्राज्ञी युजेनीको मुकुट २ सय १२ मोती र करिब २ हजार हीराले जडित थियो ।
यस गहनाको सेटलाई अत्यन्तै बहुमूल्य मानिन्छ । फ्रान्सेली सरकारी वकिल लोर बेक्कुओलाई उदृत गर्दै अन्तर्राष्ट्रिय सञ्चारमाध्यमहरूले चोरी भएका गहनाहरूको मूल्य ८८ मिलियन युरो पर्ने जनाएको छ । यसरी भएको थियो चोरी अन्तर्राष्ट्रिय सञ्चारमाध्यम ‘टाइम’ र ‘द गार्डियन’ का अनुसार १९ अक्टोबर स्थानीय समय बिहान करिब ९ः३० बजेतिर चार व्यक्ति लुभ्र संग्रहालय पुगेका थिए । ट्रकमा जडान गरिएको ‘मेकानिकल’ भर्याङ चढेर दुई जना पहिलो तलाको ‘बाल्कोनी’ पुगेका थिए ।
नकाबधारी उनीहरू त्यसपछि ‘डिस्क कटर’ ले झ्याल काटेर नेपोलियन र जोसेफिनको अमूल्य संग्रह रहेको ग्यालरीमा पुगेका थिए । चोरीपछि उनीहरू भर्याङबाट ओर्लिए र मोटरसाइकलमा तयारी अवस्थामा बसेका अन्य दुईसँगै भागे । उनीहरूले कामदारजस्तो देखिने पोसाक लगाएका थिए ।
अन्तर्राष्ट्रिय सञ्चारमाध्यम अल–जजिराका अनुसार ४ देखि ८ मिनेटभित्र यो चोरी भएको थियो । चोरहरूले भाग्ने क्रममा ट्रकमा आगो लगाउन खोजेका थिए तर सफल भएनन् । यही कारण उनीहरूले प्रयोग गरेका हेल्मेट, एंगल ग्राइन्डर, डिस्क कटर, ज्याकेट र अन्य सामग्री घटनास्थलमै छुटेका थिए ।
अहिले अनुसन्धानकर्ताले ती सामग्रीको विस्तृत विश्लेषण गरिरहेका छन् । चोरीमा संलग्नहरू पेसेवर चोर भएको अनुमान गरिएको छ । फ्रान्सेली गृहमन्त्री लरेन्ट नुनेजले यस घटनालाई अहिलेसम्मकै ठूलो चोरीमध्ये एकका रूपमा वर्णन गरेका छन् । चोरीपछि लुभ्र संग्रहालय तीन दिनसम्म बन्द भएको थियो ।
