: नेपाली कांग्रेसमा आबद्ध युवाहरूको संगठन नेपाल तरुण दलले सरकारविरुद्ध सडक आन्दोलनमा जाने चेतावनी दिएको छ।
सोमवार नेपाल तरुण दलको स्थापना दिवसमा बोल्दै अध्यक्ष विद्वान गुरुङले मुलुकमा व्यवस्था जोगाउन र आफूहरूको अस्तित्व रक्षाका लागि अब चुप लागेर बस्ने अवस्था नभएको बताएका हुन्। उनले दुर्गा प्रसाईं, सुदन गुरुङहरूले आफूहरूको अस्तित्वमाथि धावा बोलिरहेको भन्दै अब सडक संघर्षलाई अघि बढाउन तयार रहन तरुण दलका नेता, कार्यकर्तालाई निर्देशन दिए।
अध्यक्ष गुरुङले नेपाली कांग्रेसका कार्यकर्ताहरूलाई झोलेको रूपमा चित्रण गर्ने काम भइरहेको भन्दै आक्रोश समेत व्यक्त गरे। उनले भदौ २४ गते मुलुकमा भएको विध्वंस आफूहरूले रोक्न नसकेकोमा क्षमा माग्दै आगामी दिनमा त्यस्तो खालको अवस्था आउन नदिनका लागि सजग हुने समेत बताए।
अध्यक्ष विद्वान गुरुङले जेनजी आन्दोलनका नाममा नेताहरूमाथि भएको प्रहारको हिसाब–किताब हुने बताए। ‘छिटोभन्दा छिटो जति पनि विभिन्न सरकारी संरचनाहरूमा, उद्योगपति, विभिन्न पार्टी कार्यालयहरू र हाम्रा नेताहरूको घरमा पेट्रोल बममार्फत जुन क्षति पुर्याइएको छ, यिनलाई छिटोभन्दा छिटो कारबाही होस्। होइन भने हाम्रा सबै नेताहरूमाथि, पार्टीमाथि कारबाही हुँदै जाँदा अब हामी चुप बस्दैनौँ। २४ गतेको आन्दोलनमा यो सरकारमा नरहेको, सरकार बाहिर रहेका केही पार्टी, केही राजावादी, केही विदेशी दलालहरूले हाम्रा नेताहरूमाथि प्रहार गरेको छ। यसको हिसाबकिताब नेपाल तरुण दलले गर्नुपर्छ,’उनले भने ।
अध्यक्ष गुरुङले अब मुलुकको व्यवस्था जोगाउने र आफ्नो अस्तित्व जोगाउने हो भने त्यस्ता तत्त्वका विरुद्ध सडकमा उत्रिनुको विकल्प नरहेको बताए।
