: अस्ताउँदो सूर्यलाई अर्घ्य चढाउँदै सीमावर्ती मेची नदी किनारमा नेपाल र भारत दुवै देशका नागरिकले एकसाथ छठ पर्व मनाएका छन्। भद्रपुर नगरपालिका– ५ स्थित मेची नदीको पश्चिमतिर नेपाली नागरिक र पूर्वतिर भारतीय नागरिकले हर्सोल्लासका साथ छठ पर्व मनाएका हुन्।
नदी किनारको मसानघाट देखि मेची पुलको मुख्यद्वार हुँदै देवी बस्तीसम्मको करिब डेढ किलोमिटर वारिपारि करिब ५ हजार बढी पूजास्थल (घाट)मा व्रतालु तथा श्रद्धालु भक्तजनले पानीमा ओर्लिएर सूर्य भगवानको पूजा आराधना गरी अर्घ्य चढाएका थिए।
मेची पुल नजिकै मैथिल समाज भद्रपुरले अस्थायी रूपमा सूर्य भगवानको मूर्ति राखेर र युनिक समूहले देवीवस्तीमा स्थानीय रूपमा बनाएको सूर्य भगवानको मन्दिरमा विशेष पूजा आराधना गरेका थिए। भद्रपुर नगरपालिकाले छठ पर्वका अवसरमा सन्ध्याकालीन भजनसहित गंगा आरतीको आयोजना पनि गरेका थिए।
नगरपालिका, ५ नम्बर वडा कार्यालय, युनिक समूह र मैथिल समाजको संयुक्त आयोजना गरिएको गंगा आरतीमा छठ हेर्न आएका भक्त्तजनहरुको उल्लेखनीय सहभागिता रहेको नगर प्रमुख गणेश पोखरेलले जानकारी दिए। मधेसी समुदाय बाहेक अहिले साझा पर्वको रूपमा पहाडी, मारवाडी, बङ्गाली, राजवंशी, लगायतका समुदायले मेची नदीमा छठ पर्व मनाउँदा हजारौँ भक्तजनहरूको घुइँचो लागेको थियो। मेची नदीमा छठ हेर्न देशका विभिन्न जिल्ला लगायत भारतबाट पनि हजारौं दर्शनार्थी आएको मैथिल समाज भद्रपुरका सचिव सुशील कर्णले जानकारी दिए।
त्यस्तै मेची पुलमा फोटो खिचाउने र भिडियो बनाउनेको भक्तजनहरूको भीड पनि त्यतिकै थियो। मेची किनारमा व्रतालु तथा भक्तजनहरूको शान्ति सुरक्षाका लागि सशस्त्र, नेपाली प्रहरी र ट्राफिक प्रहरी करिब दुई जना सुरक्षाकर्मी परिचालन गरिएको थियो। सेनासहितको संयुक्त गस्तीले पनि सुरक्षा दिएका थिए।
जिल्लाको मेचीसहित निन्दा, हडिया, विरिङ, रतुवा, अदुवा, देउनियाँ कनकाई लगायतको नदी किनारहरूमा व्रतालु तथा भक्तजनहरूको घुइँचो लागेको थियो। मंगलबार बिहान उदाउँदो सूर्यको पूजा आराधना गरी अर्घ्य दिँदै छठ पर्व विधिवत् रूपमा समापन हुनेछ।
