: दक्षिण चीन सागरमा दुई छुट्टाछुट्टै घटनामा अमेरिकी नौसेनाका दुई विमान दुर्घटनाग्रस्त भएका छन्। घटनामा कसैको पनि मृत्यु नभएको अधिकारीहरूले बताएका छन्।
अमेरिकी नौसेनाको प्यासिफिक फ्लीटले एक विज्ञप्तिमा भनेको छ,ʻपहिलो घटनामा नियमित अपरेशनको क्रममा विमानवाहक युएसएस निमित्जबाट उडान भरेपछि दक्षिण चीन सागरमा एमएच–६० सी हक हेलिकप्टर दुर्घटनाग्रस्त भएको थियो।ʼ
विज्ञप्तिमा हेलिकप्टरमा सवार तीनै जना चालक दलका सदस्यको उद्धार गरेर सुरक्षित रूपमा बाहिर निकालिएको उल्लेख गरिएको छ।
करिब आधा घण्टा पछि नियमित अपरेशनको क्रममा यूएसएस निमित्जबाट उडान भर्ने क्रममा बोइङ एफरए–१८एफ सुपर हर्नेट लडाकु जेट पनि दक्षिण चीन सागरमा दुर्घटनाग्रस्त भएको अमेरिकी नौसेनाले बताएको छ।
अमेरिकी नौसेनाको अनुसार लडाकु विमानमा रहेका दुवै चालक दलका सदस्य आफैँ बाहिर निस्किएको बताएको छ। दुवै घटनाको कारण अनुसन्धान भइरहेको विज्ञप्तिमा उल्लेख छ।
अमेरिकी राष्ट्रपति डोनाल्ड ट्रम्प एसियाको भ्रमणमा रहेका बेला दुवै घटना भएका हुन्। ट्रम्प सोमबार जापान आइपुगेका थिए। उनले पहिले इन्डोनेसियामा समय बिताएका थिए।
यस वर्षको सुरुमा अमेरिकी नौसेना विमानवाहक ह्यारी एस. ट्रुम्यानको सञ्चालनको क्रममा मध्य पूर्वमा दुई अमेरिकी लडाकु विमान हराएका थिए।
