: नेपाली कांग्रेसका कार्यवाहक सभापति पूर्णबहादुर खड्काले पर्व राष्ट्रिय पहिचान र समृद्ध समाज निर्माणमा योगदान पुर्याउने माध्यम बनेको बताएका छन्। छठ पर्वको शुभ–कामना दिँदै उनले नेपाल बहुजातीय, बहुभाषिक, बहुसांस्कृतिक र बहुधार्मिक विशेषतायुक्त मुलुक भएको बताएका हुन्।
‘नेपाल बहुजातीय, बहुभाषिक, बहुसांस्कृतिक र बहुधार्मिक विशेषतायुक्त मुलुक हो । यहाँ मनाइने विविध चाडपर्वहरूले हामी सबैलाई आपसी सद्भाव, सहिष्णुता र राष्ट्रिय एकताको सूत्रमा आबद्ध गरिरहेका छन् ।’उनले भने, ‘हाम्रा यस्ता पर्वहरूले सामाजिक सम्बन्धलाई सुदृढ पार्ने मात्र होइन; राष्ट्रिय पहिचान र समृद्ध समाज निर्माणमा योगदान पुर्याउने माध्यमका रूपमा समेत काम गरिरहेका छन् ।’
“छठ” पर्व नेपाली समाजमा धार्मिक आस्था, सांस्कृतिक परम्परा र सामाजिक एकताको अद्वितीय प्रतीकका रूपमा स्थापित रहेको उनको भनाई छ। पर्वले समुदायमा सामूहिक भावना, अनुशासन, पारिवारिक एकता र सामाजिक सद्भाव प्रवर्द्धन गर्न महत्वपूर्ण भूमिका निर्वाह गर्दै आएको सन्देशमा उल्लेख छ ।
खड्काले अति श्रद्धाका साथ मनाइने “छठ पर्व” ले सबैको घरपरिवारमा सुख, शान्ति र समृद्धिको वातावरण सिर्जना गर्दै सामाजिक सद्भाव अभिवृद्धि गर्न सबैलाई प्रेरित गर्न सकोस् भन्ने कामना गरे।
