। सरकारले सडक प्रदर्शनको तयारी गरिरहेका राजनीतिक दलहरूलाई सुरक्षा जोखिमलाई ध्यानमा राखेर प्रदर्शनमा नजान र संवादमार्फत आफ्ना कुराहरू राख्न अपिल गरेको छ ।
शनिबार बिहान सुरक्षा निकायका प्रमुखसहित प्रधानमन्त्रीको सरकारी निवास बालुवाटारमा झण्डै दुई घण्टा वार्ता भएको थियो । पछिल्लो परिस्थिति र आगामी निर्वाचनको सुरक्षा लगायतका विषयमा छलफल केन्द्रीत भएको प्रधानमन्त्रीको सचिवालयले जनाएको छ ।
यसैबीच गृहमन्त्री ओमप्रकाश अर्यालले संवादमार्फत राजनीतिक दलहरूको माग सुनुवाइ सरकारले गर्ने प्रतिबद्धता जनाए । उनको भनाइमा, अब सडक प्रर्दशन आवश्यक पनि छैन ।
‘अब सडकमा नगई पनि संवाद हुन्छ भने संवादमा नै आउनुपर्छ । सडकमा जान जरुरी छैन । अब सडकमा जानुपर्ने परिस्थिति हुन्छ भने पनि त्यो लोकतान्त्रिक अधिकार प्रयोग गर्दा अरुको अधिकारमा हनन् हुनुपनि भएन,’ गृहमन्त्री अर्यालले भनेका छन्, ‘सार्वजनिक सम्पत्तिमा क्षति पुर्याउनु पनि भएन । निजी सम्पतीमा क्षति पुर्याउनु पनि भएन । कहीँकतै हिंसा हुनै भएन । अहिंसात्मक तरिकाले गर्नुपर्दछ ।’
आजको छलफलमा मुलुकमा सुरक्षा अवस्थाको सुक्ष्म विश्लेषण गरी निर्वाचनको वातावरण बनाउने विषयमा छलफल केन्द्रित भएको गृहमन्त्री अर्यालको भनाइ छ ।
‘खासगरी सुरक्षा अवस्थाको सुक्ष्म विश्लेषण हो अहिले । स्थिति सामान्यीकरण गर्ने र अरु बाँकी चुनावको वातावरण बनाउनका लागि चाहिने शान्ति सुरक्षाको प्रत्याभूति दिने कुरामा नै केन्द्रित छौं,’ उनले भनेका छन्, ‘आज विषयवस्तुको सुक्ष्म विश्लेषण भयो । र खास गरेर सडक प्रर्दशनसँग सम्बन्धित विषयवस्तुहरू र त्यसले निम्त्याउने सुरक्षा जोखिमका बारेमा हामीले गहन छलफल गरेका छौं ।’
उनले दलहरूलाई संवादका लागि अपिल गरिएको बताए ।
‘जसका पनि राजनीतिक मागहरू छन भने सरकारले संवादको माध्यमबाट ती कुराहरू सुनिदिन्छ । अब संवादमा इन्गेज हुनुपर्यो । किनभने अब सडकमा जाने पनि सरकारलाई सम्वादको लागि अपिल गरेको हो,’ उनले भनेका छन् ।
सरकार तत्कालका लागि संवादकै नीति अनुसार अघि बढ्ने पनि उनले जानकारी गराए ।
‘यो कुराको सम्झदारी हामी विभन्नि राजनीतिक दलहरू जो आन्दोलनकारी हुनुहुन्छ । उहाँहरूसँग सरकारले यो अनुरोध गरिरहन्छ । सरकार यो नीतिअनुसार चल्छ तत्काललाई । जो राजनीतिक शक्ति छन् । त्यो शक्ति भनेको धेरै जिम्मेवार शक्ति हो,’ गृहमन्त्री अर्यालले भने, ‘भविष्यमा देश चलाउने हो भनेर जसले भन्नुहुन्छ । त्यो भनेको राजनीतिक कुरा हो । राजनीतिक कुरा भएपछि राजनीतिक व्यवहार पनि हुनुपर्यो । राजनीतिक संस्कार पनि हुनुपर्यो ।’
सरकारले मुलुकका सुरक्षा अवस्थामा जोखिम निम्तिने अवस्था विद्यमान रहेको उल्लेख गर्दै सडक प्रदर्शनमा नजान सबै राजनीतिक शक्तिहरूलाई आग्रह गर्दै आएको छ ।
