— एआई क्षेत्रमा काम गरिरहेको कम्पनी फ्युजमसिन्सले अमेरिकाको स्टक एक्सचेन्ज नास्डाकमा सेयर सूचीकृत गरेर कारोबार थालेको छ । कम्पनीले ‘फ्युज’ टिकरसहित स्थानीय समयअनुसार बिहीबारबाट कारोबार सुरु गरेको हो ।
विशेषगरी प्रविधि उद्योगका ठूला कम्पनीको सूचीकरणका लागि प्रसिद्ध नास्डाकमा एप्पल, माइक्रोसफ्ट, गुगल, अमेजन, मेटाजस्ता ठूला टेक कम्पनी सूचीकृत छन् । फ्युजमसिन्सले सीएसएलएम एक्विजिसन करसँगको व्यापारिक संयोजन पूरा गरेपछि नास्डाक ग्लोबल मार्केटअन्तर्गत सूचीकृत भएको कम्पनीले जारी गरेको विज्ञप्तिमा उल्लेख छ ।
बिहीबार ३.३३ डलर रहेको कम्पनीको प्रतिसेयर मूल्य शुक्रबार ४ डलर पुगेको छ । कम्प्युटर वैज्ञानिक समीर मास्केले सन् २०१३ मा संयुक्त राज्य अमेरिकामा फ्युजमसिन्स इंक स्थापना गरेका थिए । हाल यो कम्पनी नेपालसहित क्यानडा, डोमिनिकन रिपब्लिकलगायत विभिन्न देशमा विस्तार भएको छ ।
नेपाली मूलका उद्यमीले स्थापना गरेको प्रविधि कम्पनी अमेरिकी स्टक एक्सजेन्जमा सूचीकृत हुनुलाई नेपालको प्रविधि क्षेत्रले उपलब्धिका रूपमा लिएको छ । एआईलाई सबै मानिसको पहुँचमा पुर्याउने आफूहरूको लक्ष्यमा यो उपलब्धि थप नयाँ अध्याय बनेको कम्पनीले जनाएको छ ।
‘एउटा सानो समूहसँग विचार–विमर्श र नवप्रवर्तनको प्रयासबाट सुरु गरेको यो कम्पनी नास्डाकमा सूचीकृत भइन्जेल हामीले लामो यात्रा तय गरेका छौं,’ फ्युजमसिन्सका प्रमुख मास्के भन्छन्, ‘यो उपलब्धि हाम्रो सामूहिक प्रयासबिना सम्भव हुने थिएन । यो हाम्रा लागि एउटा निर्णायक क्षण हो र वर्षौंको मिहिनेतको परिणाम पनि हो । तथापि यसलाई हामीले यात्रा सुरुवात मानेका छौं ।’
