: पाल्पामा दुई मोटरसाइकल एक आपसमा ठक्कर हुँदा एक जनाको मृत्यु भएको छ। ३ जना घाइते भएका छन्। मृत्यु हुनेमा बगनासकाली गाउँपालिका-९ का २८ वर्षीय अर्जुन विक रहेको जिल्ला प्रहरी कार्यालय पाल्पाका सूचना अधिकारी होम प्रकाश चौधरीले जानकारी दिए। मृतक विक लु १३ प ८६३५ नम्बर मोटरसाइकलको पछाडि सवार थिए।
तानसेन बाट रामपुर तर्फजाँदै गरेको लु १३ प ८६३५ नम्बरको मोटरसाइकल र विपरीत दिशा बाट आएको लु ७७ प ४५०५ नम्बरको मोटरसाइकल कालीगण्डकी करिडोरको तुरुङ्दी खोलामा एक आपसमा ठक्कर खाई शुक्रवार दिउँसो साढे २ बजे दुर्घटना भएको पाल्पा प्रहरीले जनाएको छ।
दुर्घटनामा घाइते भएका ४ जनाको रामपुर अस्पतालमा उपचारका लागि लगिएकोमा घाइते अर्जुन विकलाई अस्पतालका चिकित्सकले मृत घोषणा गरे। अन्य ३ जनाको रामपुर अस्पतालमै उपचार भइरहेको छ उनीहरूको अवस्था मध्यम रहेको अस्पतालले जनाएको छ।
घाइते हुनेहरूका लु १३ प ८६३५ का चालक बगनासकाली-९ पाल्पाका ५१ वर्षीय विष्णु प्रसाद विक, लु ७७ प ४५०५ का चालक स्याङ्जा चापकोट नगरपालिका ९ का २९ वर्षीय विवेक भट्टराई र पटाडि सवार तिलोत्तमा नगरपालिका ५ मणिग्राम रुपन्देहीका दीपक पाण्डे रहेको पाल्पा प्रहरीले जनाएको छ।
