: केन्द्रीय कारागार नुवाकोटका कैदीबन्दीहरुले एक–आपसमा खुशीयाली साटासाट गर्दै सामूहिक रूपमा यस वर्षको तिहार पर्व मनाएका छन्। विदुर नगरपालिका–६ खम्पाक्याम्पमा रहेको केन्द्रीय कारागार नुवाकोटमा रहेका कैदीबन्दीले बिहीबार एकआपसमा भाइटीका लगाउनुका साथै सामूहिक रूपमा देउसी भैलो खेलेका हुन्।
विभिन्न मुद्दामा कैद सजाय पाएका तथा मुद्दा फैसला नहुन्जेलसम्मका लागि बन्दी जीवन बिताइरहेकाहरूले कारागारभित्रै एकआपसमा रमाइलो गर्दै तिहार मनाएको कारागार कार्यालयले जनाएको छ।
कारागारमा बन्दी जीवन व्यथित गरिरहेकाहरूले नै दाजुभाइ र दिदीबहिनी मानेर एकआपसमा भाइटीका लगाएको कारागार प्रशासनले जनाएको छ।
केन्द्रीय कारागारमा रहेका कैदीबन्दीहरुलाई कारागारमै पुगेर बिहीबार दिनैभर आफ्ना दिदीबहिनी तथा दाजुभाइले भाइटीका लगाइदिएको कारागार प्रमुख तथा जेलर भेषवहादुर कुँवरले जानकारी दिए। कतिपय बन्दीहरुले कारागारमै दाजुभाइ तथा दिदीबहिनी मानेर सप्तरंगी टिका लगाए भने बन्दीहरूका दिदीबहिनी पनि कारागारमै आएर भाइटिका लगाइदिएको कुँवरले बताए।
खम्पाक्याम्पस्थित केन्द्रीय कारागार नुवाकोटमा रहेका ३७ महिलासहित आठसय ८९ जना कैदीबन्दीहरुले एकआपसमा खुसी साटासाट गर्दै दिदीबहिनीसँग भाइटीका लगाएर तिहार पर्व मनाएका हुन्। जेलर कुवरका अनुसार कारागारमा तीन वटा ब्लकमा रहेका बन्दीहरूका लागि त्रिपाल हालेर टिका लगाउने प्रबन्ध गरिएको थियो।
