: जिल्ला प्रशासन कार्यालय प्युठानले राति १० बजेपछि देउसी भैलो, नाचगानका कार्यक्रम नगर्न अनुरोध गरेको छ।
शान्ति सुरक्षालाई मध्यनजर गर्दै भीडभाडजन्य गतिविधि गरि समाजको शान्ति सुरक्षामा खलल पुग्ने कार्य नगर्न नगराउन प्रशासनले आग्रह गरेको हो। सार्वजनिक सूचना जारी गर्दै प्रशासनले देउसी भैलो कार्यक्रम गर्दा सार्वजनिक यातायात र जनजीवनमा असर नपर्ने गरी शान्तिपूर्ण, मर्यादित र अनुशासित रूपमा सञ्चालन गर्न आग्रह गरेको हो।
मदिरा सेवन गरि सार्वजनिक स्थानमा होहल्ला नगर्न र तिहारको समयमा मैनबत्ती, दियो बाल्दा सावधानी अपनाउन अनुरोध गरिएको प्रमुख जिल्ला अधिकारी दीपकराज नेपालले बताए।
प्रशासनले पटाका लगायत प्रज्वलनशील तथा विस्फोटक पदार्थ ओसारपसार, बिक्री तथा प्रयोगमा निषेध गर्दै जुवा तास जस्ता खेल नखेल्न नखेलाउन अनुरोध पनि गरेको छ। सार्वजनिक अनुरोध विपरीत कार्य भएमा कानुनी कारबाही गर्ने समेत प्रशासनले चेतावनी दिएको छ।
