: अमेरिकाले प्यालेस्टाइनी विद्रोही समूह हमासले गाजामा सर्वसाधारणमाथि आक्रमणको योजना बनाइरहेको दावी गरेको छ। अमेरिकी विदेश मन्त्रालयले शनिबार हमासले गाजामा सर्वसाधारणमाथि आक्रमण गर्ने योजना बनाइरहेको संकेत गर्ने विश्वसनीय रिपोर्ट प्राप्त भएको बताएको छ।
गाजामा फेरि आक्रमण भए युद्धविराम सम्झौताको गम्भीर उल्लङ्घन मात्रै नभइ मध्यस्ततामार्फत् अहिलेसम्म प्राप्त प्रगतिलाई कमजोर बनाउने मन्त्रालयको भनाइ छ।
अमेरिकाले इजिप्ट, कतार र टर्कीलाई पहिले नै यसबारे जानकारी गराइसकेको र हमासलाई युद्धविरामका सर्तहरू पालना गर्न माग गरेको बताएको छ।
'यदि हमासले आक्रमण गर्छ भने गाजाका जनताको सुरक्षा सुनिश्चित गर्न र युद्धविराम कायम राख्न कदम चालिनेछ,' विदेश मन्त्रालयको विज्ञप्तिमा भनिएको छ। हमासले अहिलेसम्म यस कथनमा कुनै टिप्पणी गरेको छैन।
हाल इजरायल र हमास बीचको युद्धविरामको पहिलो चरण लागू भएको छ। हमासले जीवित बन्धकहरूलाई रिहा गरेको छ भने मृतकहरूको शव इजरायललाई हस्तान्तरण गर्ने प्रक्रिया चलिरहेको छ।
