आइसीसी टी-२० विश्वकप २०२६ मा नेपालले स्थान पक्का गरिसकेको छ।
आज दिउँसो यूएईले सामाओलाई हराउँदा नेपाल र ओमानले २०२६ भारत र श्रीलंकामा हुने विश्वकपमा स्थान पक्का गरेका हुन्।
नेपालले आज घरेलु टिम ओमानमाथि ३८ रनको जित निकाल्दै अंक तालिकाको शीर्षमा उक्लिएको छ। आजको जितले नेपाल जारी प्रतियोगिताको उपाधिमा एक कदम मात्र पर रहेको छ।
नेपालका कप्तान रोहितको नजर पनि यही उपाधिमा रहेको छ। ‘हामीले यूएई र सामाओको खेल हेरेका थियौँ। हामी विश्वकप पुग्यौँ भन्ने खेल अगाडी नै थाहा थियो। तर हाम्रो नजर यो प्रतियोगिताको उपाधिमा थियो। त्यसको लागि आजको खेलमा जित निकै महत्त्वपूर्ण थियो,’ उनले पोष्ट म्याच प्रेजेन्टेसनको क्रममा भने।
रोहित लगातार दोस्रो पटक नेपाललाई विश्वकपमा डोर्याउने कप्तान हुन्। उनी भन्छन्, ‘म यो खुसी शब्दमा बयान गर्न सक्दिन । म निकै भाग्यशाली छु यो खेलाडीहरूको समूह छ। कोचिङ स्टाफ र टिम निकै राम्रो पाएको छु।’
आगामी वर्ष फेब्रुअरी र मार्चमा भारतमा हुने विश्वकपमा धेरै नेपाली समर्थकले समर्थन जनाउन आउनेमा उनी विश्वस्त देखिन्थे। उनले भने, ‘भारत नेपालबाट नजिकै छ। धेरै नेपाली समर्थकको अगाडि नै खेल्न पाउनेछौँ । भारतमा धेरै नेपाली समर्थक जान सक्छन् र धेरै नेपालीहरू भारतमा पनि बस्छन्।’
उनले हरेक कुरा अंग्रेजीमा भन्दै गर्दा नेपाली समर्थकलाई धन्यवाद ज्ञापन भने नेपालीमा गरे। उनले भने, ‘सम्पूर्ण नेपाली जनतालाई बधाई छ। यसै गरी माया गरिरहनु होला। समर्थन गरिरहनु होला हामी अझ राम्रो खेल्दै जानेछौँ।’
नेपाल र ओमानसँगको खेलमा प्लेअर अफ दी म्याच बनेका कुशल भुर्तेल पनि आगामी विश्वकपका लागि छनोट हुँदा निकै खुसी लागेको बताए। उनले भने,‘धेरै गर्व लागिरहेको छ। लगातार विश्वकप खेल्न पाउँदा निकै खुसी छु।’
उनले अघिल्लो सिजनको विश्वकपमा भन्दा राम्रो प्रदर्शन गर्ने समेत बताए। उनले भने,‘गएको विश्वकपमा हामीले टेष्ट राष्ट्रसँग केही निराशा भोग्यौँ । यो पाली अझ राम्रो गर्नेछौँ।’
नेपालले छनोटको अन्तिम खेल शुक्रबार सामाओसँग खेल्नेछ।
