— दाना उद्योगको पर्खाल भत्किँदा बुधबार चितवनको रत्ननगरमा तीन जनाको निधन भएको छ । अरू थप दुईजना घाइतेको अवस्था मध्यम रहेको छ ।
मृतक तीनजना र घाइते गरी सबै पाँचजना उद्योकका कामदारहरू रहेको चितवन जिल्ला प्रहरी कार्यालयले जनाएको छ ।
चितवनको रत्ननगर नगरपालिका-१२ शान्तीकुञ्ज टोलको किसान दाना उद्योगमा बिहान पौने १० बजे तिर उक्त घटना भएको थियो ।
मृत्यु हुनेमा खैरहनी नगरपालिका-२ का शुकराम दराई, गोरखा घर भइ हाल रत्ननगर-१२ बस्ने ५४ वर्षका रेशम दमाई र रत्ननगर-१२ का ४५ वर्षीय कमल गुरूङ रहेको चितवन जिल्ला प्रहरी कार्यालयका प्रवक्ता डिएसपी रविन्द्र खनालले जानकारी दिए ।
घटनापछि गम्भीर घाइते भएका उनीहरूको उपचारका क्रममा चितवन मेडिकल कलेजको भरतपुरमा रहेको शिक्षण अस्पतालमा निधन भएको हो ।
घटनाका घाइते रत्ननगर-१२ का ३९ वर्षीय जितेन्द्र महतो र सोही ठाउँका ४० वर्षीय अंकजप्रसाद थारूको सोही अस्पतालमा उपचार भइरहेको छ । हात खुट्टामा चोट लागेका दुवैजनाको अवस्था मध्यम रहेको चितवन प्रहरीको भनाइ छ ।
‘दाना उत्पादन गरेर राख्ने गोदाम जस्तो ठाउँको पर्खाल भत्केर त्यहाँ काम गर्नेहरूलाई च्यापेको रहेछ । भत्केको पर्खाल र बोराहरूसमेतले कामदारहरूलाई थिचेको भन्ने छ’ घटनास्थल पुगेका चितवन जिल्ला प्रहरी कार्यालयका प्रहरी उपरीक्षक (एसपी) गोविन्द पुरीले भने ।
