— मधेश प्रदेशका दुई प्रदेशसभा सदस्यले जनमत पार्टीबाट छुट्टिएर बनेको जनस्वराज पार्टी रोजेका छन् ।
बुधबार प्रदेश निर्वाचन कार्यालय जनकपुरधाममा मधेश प्रदेशका निवर्तमान मुख्यमन्त्री सतिशकुमार सिंह र प्रदेशसभा सदस्य त्रिभुवन साहले जनस्वराज पार्टी रोजेर हस्ताक्षर गरेका हुन् । यी दुवै डा. सीके राउत नेतृत्वको जनमत पार्टीबाट प्रदेशसभा सदस्य भएका थिए । सिंह मुख्यमन्त्री र साह मन्त्री थिए ।
दुवै जनालाई आफ्नै पार्टीले हटाएपछि उनीहरु असन्तुष्ट बनेका थिए । हस्ताक्षर गर्न पुगेका मुख्यमन्त्रीले अन्य प्रदेशसभा सदस्यलाई जनमत पार्टीले अपहरण गरेर राखेको प्रतिक्रिया दिएका छन् । लोकतन्त्रमा निरंकुश व्यवहार गरेको उनको आरोप छ । ‘बिहानैदेखि सबैलाई अपहरण गरेर राखेको छ । सबैलाई धम्की दिइरहेका छन्,’ उनले भने, ‘यो तरिकाको गैरराजनीतिक काम जनमत पार्टीका नेताहरु गर्दै छन् ।’
लोसपाले बिहान ६ दलका ५७ सांसदको समर्थनमा प्रदेश प्रमुख समक्ष सरकारको नेतृत्वग र्न दाबी पेश गरेका थिए । जसमा यी दुई सांसदको मत पनि गणना गरिएको छ । अब यी दुई सांसदले जनस्वराज रोजेपछि लोसपा नेतृत्वमा सरकार नेतृत्वका लागि भएको दाबीमा असर पर्ने देखिन्छ ।
मधेश प्रदेश सरकार नेतृत्वका लागि कांग्रेस र लोकतान्त्रिक समाजवादी (लोसपा) नेपालले बुधबार दाबी पेस गरेका छन् ।लोसपाबाट सांसद जितेन्द्र सोनल नेतृत्वमा र कांग्रेसबाट कृष्णप्रसाद यादवको नेतृत्वमा सरकार गठनका लागि दाबी पेस गरिएको प्रदेश प्रमुखको कार्यालयका निमित सचिव सत्रुधन प्रसाद यादवले जानकारी दिए ।
मधेश प्रदेशका मुख्यमन्त्री सतिशकुमार सिंहले आफ्नै पार्टी जनमतले प्रपञ्च रचेको र सरकारमा सहभागी दलहरूले वचन फेरेको आरोप लगाउँदै मंगलबार राजीनामा दिएपछि मधेशमा नयाँ सरकार गठनका लागि रस्साकस्सी चलिरहेको छ ।
