— अखिल नेपाल फुटबल संघ (एन्फा) ले मंगलबार त्यस्तो पत्रकार सम्मेलन गरेको छ, जसले प्रश्नलाई बढी अनुत्तरित पारेको छ । लिगमा केन्द्रित रहेर सातदोबाटोस्थित एन्फा कम्प्लेक्समा आयोजित कार्यक्रममा महासचिव किरण राईले सहिद स्मारक लिग ‘ए’ डिभिजन यही दिन हुनेछ भनेर भन्न सकेनन् । तर, एउटा विश्वास भने दिलाए, ‘ढिला भए पनि अब राम्रो लिग हुनेछ ।’
दुई दिनअघि प्रमुख ‘ए’ डिभिजन क्लबहरूले लिग आयोजना गर्न छुट्टै अधिकारसम्पन्न कमिटी गठनको माग गरेको थियो । त्यस्तै एक दिनअघि एन्फाकै केही प्रमुख पदाधिकारीले लिग नगर्ने हो भने नेतृत्वलाई राजीनामा दिन पनि चुनौती दिएका थिए । यसबीच केही फुटबल प्रशंसकले एन्फा कम्प्लेक्सकै अगाडि नै विरोध पनि प्रदर्शन गरे । प्रदर्शनको कारण लामो समयदेखि लिग फुटबल नभएको नै थियो ।
यसै पृष्ठभूमिमा मंगलबार मिडियाको सामना गर्दै महासचिव राईले भने, ‘हाम्रो उद्देश्य क्लबलाई सहयोग गर्ने नै हो, सहकार्य गर्ने नै हो । अबको लिग होम एन्ड अवेको आधारमा गर्ने भएपछि यसका लागि थप गृहकार्य आवश्यक छ । यसका लागि तिहारपछि हामी क्लबहरूसँग छलफलमा बस्नेछौं । यस्तोमा अब यो ढाँचाको लिग अर्को वर्ष मात्र हुनेछ । तर यसबीच हामी त्यसै चुप लागेर भने बस्ने छैनौं ।’
उनले अगाडि थपे, ‘त्यसकारण यसबीच अर्को लिगको आयोजना गर्नेछौं । यो टायर–वानकै लिग हुनेछ । तर कस्तो हुनेछ र कहिले हुनेछ, त्यसबारे निर्णय हुन बाँकी छ ।’ यस्तोमा अब चाँडै हुने लिग ‘ए’ डिभिजन नै हुन सक्नेछ या राष्ट्रिय लिग पनि हुन सक्नेछ । एन्फाको विधानले यी दुवै लिगलाई टायर–वान मानेको छ । पुस ९ मा लिग हुने घोषणा यसअघि नै भइसकेता पनि केही दिन तलमाथि हुन सक्ने बताइएको छ ।
‘यो लिग एसियाली फुटबल महासंघ (एएफसी) को नियमअनुसार ६ महिना लामो चल्नेछ र यसको विजेताले एएफसीको प्रतियोगिता पनि खेल्न पाउने छ,’ महासचिव राईले जानकारी गराए । लामो समयदेखि लिग नभएकामा नेपाली फुटबल प्रशंसकले देखाएको चिन्ताप्रति कृतज्ञता जनाउँदै महासचिवले भने, ‘राम्रै गृहकार्यपछि हामी होम एन्ड अवेको आधारमा अर्को वर्ष माथिल्लो स्तरको लिग गर्नेछौं ।’
