: नेपाली कांग्रेसका सभापति शेरबहादुर देउवाले फेक भिडियो बनाएर आफ्नो चरित्र हत्या गरेको बताएका छन्। मंगलबार पार्टी कार्यालय सानेपामा केन्द्रीय समिति बैठकलाई सम्बोधन गर्दै सभापति देउवाले आफूविरुद्ध बनाइएको फेक भिडियोबारे छानबिन गर्न माग गरे।
'फेक भिडिओ छ नि जो, मेरो घरमा भेटेको भनेको त्यो। अरु देशको भिडियो तानेर ल्याएर मेरो भिडियोमा हाल्दिएको छ। एआईबाट भिडियो बनाएको कुरा स्पष्ट भइसकेको छ। मेरो खिलाफ फेक भिडियो बनाएकाले त्यस विषयमा पनि छानबिन होस्,' उनले भने।
सभापति देउवाले गत भदौ २४ गते ज्यानै लिने मनसायले आफू र परिवारमाथि हमला गरिएको बताए। उनले आफ्नो प्रतिष्ठा र छबि गिराउन सुनियोजितरूपमा झुटो प्रचारसमेत गरिएको बताए।
'भदौ २४ गते सिंगो मुलुक जलेको बेला म र मेरा परिवारमाथि पनि ज्यानै लिने मनसायले सांघातिक हमला गरियो। घरमा तोडफोड, लुटपाट र आगजनी गरे। सुरक्षाकर्मीको घन्टौंको अथक प्रयासपछि हामीलाई उद्धार गरिएको थियो। म र मेरो परिवारले कस्तो त्रासदीपूर्ण भौतिक आक्रमणको सामना गर्नुपर्यो तपाईंहरू जानकार नै हुनुहुन्छ। त्यतिले नपुगेर हाम्रो प्रतिष्ठा छबि गिराउन सुनियोजित रूपमा झुटा प्रचार गरियो,' सभापति देउवाले भने।
बैठकमा उनले जेनजीका जायज मागलाई सम्बोधन गरिनुपर्ने बताए। 'उहाँहरूको मुलुकप्रतिको चासो र चिन्ताको सम्बोधन गर्नैपर्छ। यस विषयमा पनि बैठकमा छलफल हुनेछ,' उनले भने।
