: एएफसी एसियन कप छनोटको तेस्रो चरणको चौथो खेलमा नेपालले भियतनामसँग १–० ले पराजित भएको छ। लगातार ४ खेलमा हार बेहोर्दा नेपालले एसिया कपमा छनोट हुने सम्भावना सकाएको हो।
भियतनामको थोङ नाट स्टेडियममा खेलको पाचौं मिनेटमा नेपालका डिफेन्डर सुमन श्रेष्ठबाट आत्मघाती गोल बेहोर्दै नेपाल सुरुवाती समयमा नै १–० ले पछाडि परेको हो। कर्नरबाट आएको बल क्लियर गर्नुपर्ने बल उनले बाहिर फ्याँक्दा नेटमा प्रहार भएको हो। यो गल्ती नै आजको निर्णायक गोल बन्यो।
आत्मघाती गोल नेपालको लागि एसिया कपबाट बाहिरिने बाटो बन्यो। नेपालले यसअघि लाओसको २ खेल र मलेसियासँग १ खेल खेलेको नेपालले समूह चरणबाटै एसिया कपलाई बिट मार्यो। अर्को वर्ष साउदी अरेवियामा हुने एसिया कपको झिनो आशा पनि सकिएको छ।
समूह एफमा रहेको नेपालले पहिलो खेलमा मलेसियासँग २–० को हार बेहोरेको थियो। दोस्रो खेलमा लाओससँग २–१ ले पराजित भएको नेपालले तेस्रो खेलमा भियतनामसँग ३–१ को हार बेहोरेको थियो। पहिलो हाफको खेलमा नेपालले मुस्किलले २ मौका पायो। त्यो पनि सदुपयोग भने गर्न सकेन। पहिलो हाफमा पूर्णतः भियतनाम बल पोजिसनमा हाबी रह्यो।
दोस्रो हाफको सुरुवातमा नेपालले केही अवसर प्राप्त गर्यो। खेलको ५३ औं मिनेटमा नेपालले फ्रि किक पाएको थियो तर त्यसलाई नेपालले सदुपयोग गर्न सकेन। ५७ औं मिनेटमा नेपालका लागि जिलेस्पी जंग कार्कीको उत्कृष्ट क्रस फिनिस भने हुन सकेन। खेलको ६४ औं मिनेटमा नेपालका जिलेस्पी जंग कार्कीलाई फाउल हुँदा फ्रि किक पाएको थियो। उक्त फ्रि किक सिधा भियतनामका किपरको हातमा पर्यो। दोस्रो हाफमा केही चलायमान र बढी मौका बनाएको नेपालले गोल भने निकाल्न सकेन।
भारी वर्षा हुँदा खेल आधा घण्टा ढिलो सुरु भएको थियो। वर्षा भएका कारण पहिलो हाफ खेलाडीलाई खेल्न निकै गाह्रो भयो। बलको पोजिसन मेन्टेन गर्न गाह्रो भएको थियो। समूह एफ मा रहेको नेपालसँगै लाओस, भियतनाम र मलेसिया रहेका छन्।
