: सुनसरीमा लागूऔषध ओसारपसार र बिक्रीवितरणका घटना दिनानुदिन बढ्दै गएको छ। दैनिक रूपमा प्रतिबन्धित लागू औषध गाजा, ब्राउन सुगरदेखि विभिन्न ट्याब्लेटसहित मानिसहरू पक्राउ परेपनि नियन्त्रणमा चुनौती कायमै रहेको प्रहरीको भनाइ छ।
सोमबार बेलुका पनि प्रहरी टोलीले धरान उपमहानगरपालिका–१७ पटनाली हरिणखोला नजिकैबाट ठूलो परिमाणमा लागू औषध बरामद गरेको ईलाका प्रहरी कार्यालय धरानका डिएसपी भीषणबाबू राईले जानकारी दिए। अस्थायी प्रहरी चौकी रेल्वेबाट खटिएको टोलीले धरानबाट चतरा तर्फ जाँदै गरेको प्र.१–०५–००१ ह ०१४७ नम्बरको टेम्पोलाई रोकी चेकजाँच गर्दा टेम्पोमा सवार उदयपुर त्रियुगा नगरपालिका–७ का १९ वर्षीय दिपक मगरको झोलाबाट ट्रामाडोल ३ हजार ९९० थान र डिकोलिक ३ हजार ९९० थान गरी झण्डै ८ हजार ट्याब्लेट लागू औषध बरामद गरिएको डीएसपी राईले बताए।
प्रहरीले अटोका चालक धरान उपमहानगरपालिका–१० का ३३ वर्षीय फिरोज मोहम्मदलाई पनि पक्राउ गरेको छ। पक्राउ परेका दुवै जनालाई अटो र बरामद लागू औषधसहित इलाका प्रहरी कार्यालय धरानमा ल्याई थप अनुसन्धान भइरहेको प्रहरीले जनाएको छ।
जिल्ला प्रहरी कार्यालय सुनसरीका डीएसपी योगराज खतिवडाका अनुसार, “सुनसरी जिल्लामा दैनिक रूपमा लागू औषधसहित व्यक्तिहरू पक्राउ परिरहेका छन्। तर यसको नियन्त्रणमा चुनौती कायम छ। अवैध कारोबार नियन्त्रणका लागि निगरानी र अनुसन्धान थप कडा पारिएको छ।”
प्रहरीले हालै विभिन्न ठाउँमा लागू औषध कारोबारमा संलग्न दर्जनौँ व्यक्तिलाई पक्राउ गरी मुद्दा दर्ता गरिसकेको छ। तर, नेपाल- भारत खुल्ला सीमा रहेको भौगोलिक अवस्थाले पनि सुनसरी लागू औषधको मुख्य मार्ग बन्न थालेको प्रहरीको भनाइ छ। लागू औषधको सेवनले यहाँका युवा युवतीहरू कुलतमा फसेका छ्न्। जसले गर्दा जिल्लामा अपराधिक क्रियाकलापका घटना समेत उनीहरूकै संलग्नतामा हुने गरेको छ।
