: तिहार नजिकिएसँगै भक्तपुरका स्थानीय प्रजापति समुदाय माटोका पाला बनाउन व्यस्त छन्। भक्तपुरको पोर्टरी स्क्वाएरमा माटाको भाँडा बनाउँदै आएका स्थानीय प्रजापति समुदाय तिहारमा माटोका पाला लगायतका भाँडा बनाउन व्यस्त रहेका हुन्।
तिहारमा माटोको पालाको माग धेरै हुने भएकाले पाला बनाउन भ्याइनभ्याई भएको स्थानीय विनोद कुमार प्रजापतिले बताए। उनले माटोको पालाको माग अनुसारको बनाउन नसकिएको उल्लेख गरे।
भक्तपुरमा उत्पादन भएका पाला उपत्यकाका साथै काभ्रे, चितवन धादिङ, नुवाकोट, पोखरा लगायतका स्थानबाट लिन आउने गरेको प्रजापतिले बताए। अहिले बजारमा प्लास्टिकका दियोहरू आएपनि माटोको पालाको मागमा भने कुनै कमी नआएको उनको भनाइ छ। पहिलेको वर्षका तुलनामा यस वर्ष माटोको पालाको भाउमा कुनै तलमाथि नभएको उनीहरूले जनाएका छन्।
भक्तपुरका स्थानीय प्रजापतिले अन्य समयमा पनि गमला, खुत्रुके लगायत माटोका सामानहरू बनाउँदै बिक्रीबितरण गर्दै आएका छन्।
