: एएफसी एसियन कप छनोट अन्तर्गत तेस्रो चरणको चौथो खेलको रूपमा नेपालले आज भियतनामसँग खेल्दैछ। दशरथ रंगशालामा हुनुपर्ने खेल मैदानको अभावले नेपालले होम म्याच पनि भियतनाममा नै खेल्न लागेको हो।
नेपाल भियतनाम बीचको खेल नेपाली समयअनुसार ६:१५ थोङ नाट स्टेडियममा हुनेछ। यसअघि नेपाल र भियतनाम बीच अवे म्याच भएको थियो । अवे म्याचमा नेपाल भियतनामसँग ३-१ले पराजित भएको थियो।
एसियन कप छनोट अन्तर्गत नेपालले हालसम्म तीनवटा खेल खेलेको छ । जसमा तिनै खेलमा नेपालले हार बेहोरेको छ। आजको खेलमा भियतनामसँग पराजित भएको खण्डमा नेपालले अर्को दुईवटा खेल्नु अगावै छनोट चरणबाट बाहिरिनेछ।
नेपालका लागि आज डिफेन्डर रोहित चन्दले राष्ट्रिय टिमको लागि १०० औं खेल खेल्दैछन्। नेपालका लागि कप्तान किरणकुमार चेम्जोङ पश्चात १०० खेलको आँकडा पूरा गर्ने रोहित दोस्रो खेलाडी हुन्।
नेपाल समूह 'एफ 'मा रहेर छनोटका खेलहरु खेल्दैछ। नेपालसहित यस समूहमा भियतनाम मलेसिया र लाओस रहेका छन्। जसमा मलेसियाले लगातार ३ खेल जित्दै ९ अंकसहित शीर्ष स्थानमा रहेको छ। भियतनामले तीन खेलबाट ६ अङ्क बटुल्दै समूहको दोस्रो स्थानमा रहेको छ। लाओसले ३ खेलबाट ३ अङ्क बटुलेको छ।
