: यो सिजनमा हिमाल आरोहीबाट १९ करोडभन्दा धेरै राजस्व संकलन भएको छ। विभिन्न ४२ वटा हिमाल आरोहणको अनुमतिबाट १९ करोड १३ लाख ८९ हजार ४४२ रुपैयाँ राजस्व आम्दानी भएको पर्यटन विभागले जनाएको छ।
आरोहण अनुमति मागेका ८०२ जनाबाट सो परिमाणमा राजस्व संकलन भएको विभागका निर्देशक हिमाल गौतमले जानकारी दिए। सबैभन्दा धेरै गोरखाको मनास्लु हिमाल आरोहण गर्न अनुमति लिनेबाट १५ करोड रुपैयाँ राजस्व संकलन भएको छ। सो हिमाल आरोहणका लागि अनुमति लिएका ३७४ जनाबाट ११ लाख २२ हजार अमेरिकी डलर अर्थात १५ करोड ७६ लाख ४० हजार १९५ नेपाली रुपैयाँ राजस्व संकलन भएको पर्यटन विभागले जनाएको छ।
८,१६३ मिटर अग्लो मनास्लु हिमाल आरोहणका लागि यसवर्ष ३१ समूहका ३७४ जनाले अनुमति लिएका बोर्डका विभागका निर्देशक हिमाल गौतमले जानकारी दिए। उनीहरूमध्ये ९५ जना महिला र २७९ जना पुरुष हुन्। ४२ वटा विभिन्न हिमाल आरोहणका लागि अनुमति लिएका आरोहीहरूबाट कूल १९ करोड राजस्व संकलन भएको थियो। जसमध्ये झण्डै १६ करोड मनास्लुबाटै संकलन भएको छ। कूल ८०२ आरोहीमध्ये ३७४ आरोहीले मनास्लु आरोहणका लागि अनुमति लिएका हुन्।
विश्वको सर्वोच्च शिखर सगरमाथा आरोहणका लागि चार जनाले मात्र अनुमति लिएका थिए। उनीहरूबाट ४२ लाख १२ हजार ३७५ रुपैयाँ राजस्व संकलन भएको छ। आठहजार मिटरभन्दा अग्लो धौलागिरि आरोहणका लागि १० जनाले, ल्होत्से, मकालु र चोयू आरोहणका लागि दुई–दुईजनाले मात्र अनुमति लिएका विभागले जनाएको छ।
विश्वको आठौं, नेपालको सातौं अग्लो हिमाल भनेर चिनिने मनास्लु चुमनुब्री गाउँपालिका-१ सामागाउँमा अवस्थित छ। यो सिजनमा अरु हिमालभन्दा मनास्लु हिमाल आरोहण गर्नेको संख्या उल्लेख्य हुन्छ।
