: अमेरिकी राष्ट्रपति डोनाल्ड ट्रम्पले नोभेम्बर १ देखि अमेरिका आउने सबै मध्यम तथा ठूला ट्रकहरूमा २५ प्रतिशत भन्सार शुल्क लगाउने बताएका छन्। ट्रम्पले सोमबार ट्रुथ सोसलमार्फत् नयाँ कर नीति लागू गर्ने घोषणा गरेका हुन्।
उनले आफ्नो पोस्टमा कुनै पनि देशको नाम भने उल्लेख गरेका छैनन्। तर, यो शुल्क अन्य देशहरूबाट अमेरिका आउने ट्रकहरूमा लागू हुनेछ। उनले लेखेका छन्, ' १ नोभेम्बर, २०२५ देखि अन्य देशहरूबाट अमेरिका आउने सबै मध्यम र ठूला ट्रकहरूमा २५ प्रतिशत भन्सार शुल्क लगाइनेछ।'
आफ्नो दोस्रो कार्यकालमा राष्ट्रपति ट्रम्पले अमेरिकी व्यापार नीतिमा व्यापक परिवर्तन गरेका छन्। अप्रिलमा उनले सबै देशहरूमा १० प्रतिशत भन्सार शुल्क लगाएका छन्, जसमध्ये केहीमा उच्च भन्सार शुल्क लगाइएको छ।
ट्रम्पले हाल भारतमा कुल ५० प्रतिशत कर लगाएको छ। उनले पहिले २५ प्रतिशत कर लगाउने घोषणा गरेका थिए। यद्यपि, केही दिनपछि, ट्रम्पले भारतले रूसबाट तेल खरिद गर्दा थप २५ प्रतिशत कर लगाउने घोषणा गरेका थिए।
