— अमेरिकी सदनका दुवै दलबीच अन्तिम समयसम्म पनि बजेटसम्बन्धी विभिन्न विषयमा सहमति जुट्न नसकेपछि सेप्टेम्बर ३० भित्र पारित भइसक्नुपर्ने बजेट पारित नभएपछि ‘सटडाउन’ को अवस्था आएको अमेरिकी सञ्चारमाध्यमले जनाएका छन् ।
रिपब्लिकन र डेमोक्रयाटहरूले एकअर्कालाई आरोप लगाउने र पन्छिने प्रयास गरिरहँदा यो सटडाउनले झन्डै ८ लाख संघीय कर्मचारीहरूलाई बेतलबी बिदामा घर पठाउनेछ । यस्तै, झन्डै २० लाख सेनासँगै अत्यावश्यक सेवाका कर्मचारीहरूले बजेट पारित भएपछि मात्र तलब पाउनेछन् । यसबाट राष्ट्रिय निकुञ्ज, संग्रहालयसँगै यस्तो बेला पहिले नै तय गरिएका अत्यावश्यकबाहेकका कार्यक्रमहरू बन्द गरिन्छन् भने सामाजिक सुरक्षा, औषधी उपचार र सुरक्षासम्म्बन्धी क्रियाकलाप भने जारी रहन्छन् ।
विश्लेषकहरूले यस्तो सटडाउनको आर्थिक क्षति झन्डै ३० करोड डलर आसपास अनुमान गरेका छन् । यसअघि अमेरिकामा डोनाल्ड ट्रम्प नै राष्ट्रपति रहँदा सन् २०१८ को अन्त्यमा पनि ३५ दिन लामो सटडाउन भएको थियो ।
