: बंगलादेशलाई हराउँदै भारत एसिया कप २०२५ को फाइनल प्रवेश गरेको छ। बंगलादेशलाई ४१ रनले हराउँदै भारतले एक खेल अगावै फाइनलमा स्थान बनाएको हो।
फाइनलमा स्थान बनाउँदासम्म भारत अपराजित रहेको छ। दुबई इन्टरनेसनल क्रिकेट स्टेडियममा टस हारेर ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १६८ रन बनाएको थियो।
भारतले दिएको १६९ रनको विजयी लक्ष्य पछाएको बंगलादेश १९.३ ओभरमा १२७ रन बनाउँदै अलआउट भयो।
बंगलादेशका लागि ओपनर ब्याटर सैफ हसनले सर्वाधिक ६९ रनको पारी खेले। उनले ५१ बलमा ३ चौका र ५ छक्का प्रहार गरे। परवेज होसेन इमोनले २१ रन बनाउँदा अन्य कुनै पनि ब्याटरको ब्याटबाट दोहोरो अङ्कको रन बनेन।
बलिङमार्फत १७० भन्दा कम आँकडामा भारतलाई रोकेको बंगलादेशले ब्याटिङमा भने प्रदर्शन गर्न सकेन। दुई ब्याटरभन्दा अन्य कुनै पनि ब्याटरले दोहोरो अङ्कको रन बनाउन नसक्नु नै बंगलादेशको लागि हारको कारण बन्यो।
भारतको लागि कुलदिप यादवले सर्वाधिक ३ विकेट लिए। जसप्रति बुमराह र वरुण चक्रवर्तीले समान २-२ विकेट लिँदा अक्षर पटेल र तिलक बर्माले १-१ विकेट लिए।
त्यसअघि, ब्याटिङ गरेको भारतका लागि अभिषेक शर्माले सर्वाधिक ७५ रनको पारी खेले। उनले ३७ बलमा ६ चौका र ५ छक्का प्रहार गरे। भारतका लागि पहिलो विकेटका लागि सुभ्मन गिल र अभिषेक शर्माले ७७ रनको साझेदारी गरेका थिए। ११. १ ओभरमा रनआउटको रुपमा पेभेलियन फर्किएका अभिषेकले ब्याटिङ गरिरहँदा भारतको अनुमानित रन १९० माथिको थियो। आक्रमक स्वभावमा ब्याटिङ गर्ने अभिषेक पेभेलियन फर्किएपछि भने भारतको ब्याटिङ सुस्ताएको हो।
ओपनर ब्याटर गिल १९ बलमा २९ रन बनाउँदै पेभेलियन फर्किएका थिए। त्यसपछि, शिवम दुबे र कप्तान सूर्यकुमार यादवले दोहोरो अङ्कको रन बनाउन नसक्दा हार्दिक पाण्ड्या केही कमान्ड सम्हाले । उनले २९ बलमा ३८ रन बनाए। अक्षर पटेल १० रनमा अविजित रहे।
बंगलादेशका लागि रसिद होसेनले सर्वाधिक २ विकेट लिए। तान्जीम हसन सकिब, मुस्तफिजुर रहमान र मोहम्मद सैफउद्दिनले १-१ विकेट लिए ।
भारतसँग फाइनलमा स्थान बनाउन बंगलादेश र पाकिस्तान खेल्दै
एसिया कप २०२५ को फाइनलमा भारतले स्थान बनाएसँगै फाइनल पुग्न आज बंगलादेश र पाकिस्तानले एकअर्कासँग खेल्दैछन्।
श्रीलंका भने लगातार २ हारसहित फाइनल दौडबाट बाहिरिसकेको छ।
सुपरफोरको पहिलो खेलमा श्रीलंकालाई ४ विकेटले हराउँदै बंगलादेशले पहिलो जित दर्ता गरेको थियो। त्यस्तै, सोही श्रीलंकालाई पाकिस्तानले ५ विकेटले हरायो।
सुपर फोरमा समान १/१ जित निकालेका पाकिस्तान र बंगलादेश आज दोस्रो जितको खोजीमा हुनेछन्। आजको खेलको विजेताले भारतसँग फाइनलमा खेल्नेछ।
सुपरफोरको अन्तिम खेलको रूपमा भारतले श्रीलंकासँग शुक्रबार खेल्नेछ।
