: नेपाली राष्ट्रिय क्रिकेट टिमको नयाँ जर्सी सार्वजनिक भएको छ। नेपाल क्रिकेट संघ (क्यान)ले सोमबार साँझ नयाँ जर्सी सार्वजनिक गरेको हो।
नयाँ जर्सीमा नासा सेक्युरिटिजको लोगो बीचमा राखिएको छ। नेपाल क्रिकेट संघसँग प्रायोजनको सम्झौता गरेको नासाले जर्सीको बीचमा स्थान पाएको छ।
नयाँ जर्सीमा रङ परिमार्जन गरिएको छ। रातो र गाढा नीलो कलरमा नयाँ जर्सी सार्वजनिक भएको छ। जसमा एउटा काँधमा चन्द्र र अर्को काँधमा सूर्य राखिएको छ। जर्सीको तल्लो भागमा सगरमाथा अंकित हिमालको प्रतिबिम्ब राखिएको छ।
पुरानो जर्सीमा पहेँलो रंगले नेपाल लेखिएको थियो भने यो नयाँ जर्सीमा सेतो रंग प्रयोग गरिएको छ।
नेपालले आईसीसी टीट्वेन्टी विश्वकपअन्तर्गत एसिया छनोटको तयारीका लागि बलियो टोली वेस्ट इन्डिजसँग शृंखला खेल्न लागेको हो । सोमबार युएई प्रस्थान गरेको नेपाली टोलीले सेप्टेम्बर २७, २९ र ३० मा संयुक्त अरब इमिरेट्स (यूएई) को शारजाह क्रिकेट स्टेडियममा टीट्वेन्टी शृंखला खेल्नेछ ।
नेपाल क्रिकेट संघ (क्यान) ले गत सोमबार रोहितकुमार पौडेलको कप्तानीमा १६ सदस्यीय टोली घोषणा गरेको छ । टोलीमा दीपेन्द्रसिंह ऐरी, आसिफ शेख, सन्दीप लामिछाने, कुशल भुर्तेल, कुशल मल्ल, लोकेश बम, मोहमद आदिल आलम, आरिफ शेख, सन्दीप जोरा, करण केसी, नन्दन यादव, गुलसन झा, ललितनारायण राजवंशी, सोमपाल कामी र साहब आलम छन् ।यस शृंखलाजलगत्तै नेपालले आईसीसी टीट्वेन्टी विश्वकप छनोटअन्तर्गत एसिया तथा इस्ट एसिया प्यासिफिकको रिजनल फाइनलमा सहभागिता जनाउनेछ । छनोट प्रतियोगिता अक्टोबर ८ देखि ओमानमा आयोजना हुनेछ ।
