— नेपाली क्रिकेट टोली संयुक्त अरब इमिरेट्स (दुबई) को भिसा नआएपछि काठमाडौं अड्किएको छ । निर्धारित तालिकाअनुसार वेस्ट इन्डिजविरुद्ध हुने तीन ट्वान्टी–२० शृंखला खेल्न नेपाली टोली शुक्रबार बिहान यूएई जाने तालिका थियो । तर भिसा नआएकाले नेपाली टोलीको निर्धारित तालिका प्रभावित बनेको हो ।
वेस्ट इन्डिजविरुद्ध सेप्टेम्बर २७, २९ र ३० मा शारजहाँमा तीन खेलको ट्वान्टी–२० शृंखला खेलेपछि नेपाली टोली ट्वान्टी–२० विश्वकप एसिया–प्यासिफिक छनोटमा प्रतिस्पर्धा गर्न ओमान जाने कार्यक्रम छ । त्यसपछि नेपालले पुनः यूएईमै आएर यूएई र अमेरिकासँग लिग २ मा प्रतिस्पर्धा गर्नेछ ।
यूएईले यसै साता नेपाललाई भिसामा रोक लगाएपछि क्रिकेट टोलीले भिसा पाउन ढिलाइ भएको नेपाल क्रिकेट संघ (क्यान) का प्रवक्ता छुम्बी लामाले बताए । उनका अनुसार अन्तर्राष्ट्रिय क्रिकेट परिषद् (आईसीसी) र यूएई सरकारसँग नेपाली क्रिकेट टोलीको भिसा ढिलाइका बारेमा छलफल भइरहेको छ ।
‘यूएईले नेपाललाई भिसा नदिने नीतिगत निर्णय हो, त्यसैले नीतिगत रूपमै कुरा भइरहेको छ,’ लामाले भने, ‘सोमबार अगाडि भिसा आउने सम्भावना देखिँदैन । शारजहाँ पुगेर एक साता अभ्यास गर्ने कार्यक्रम थियो । लिग २ पनि त्यही हुने हुनाले चाँडै गएर वातावरणसँग घुलमिल हुन हामी एक साताअगाडि नै जान लागेका थियौं ।’
मुख्य प्रशिक्षक स्टुवार्ट ल भने शुक्रबार नै दुबई पुगेको प्रशिक्षक ज्ञानेन्द्र मल्लले बताए । साथै उनका अनुसार स्ट्रेन्थ एन्ड कन्डिसन प्रशिक्षक अब्दुर सतार पनि भारतबाटै दुबई पुग्ने कार्यक्रम छ ।
