: एसिया कप २०२५ को समूह ए अन्तर्गतको अन्तिम खेलमा भारतले ओमानलाई २१ रनले पराजित गरेको छ। अबुधाबीस्थित जइद क्रिकेट स्टेडियममा टस जितेर ब्याटिङ गरेको भारतले निर्धारित २० ओभरमा ८ विकेट गुमाउँदै १८८ रन बनाएको थियो।
भारतले दिएको १८९ रनको विजयी लक्ष्य पछाएको ओमानले निर्धारित २० ओभरमा ४ विकेट गुमाउँदै १६७ रन बनाउन सक्यो। ओमानका लागि ओपनर ब्याटर अमिर कलिमले सर्वाधिक ६४ रन बनाए । उनले ४६ बलमा ७ चौका र २ छक्का प्रहार गरे। अर्का ओपनर कप्तान जतिन्दर सिंहले ३२ रन बनाए हमाद मिर्जाले ५१ रन बनाउँदा जितेन रमानाण्डी १२ रनमा अविजित रहे।
भारतका लागि बलिङमा हार्दिक पाण्ड्या, अर्षदीप सिंह, हर्षित राना र कुलदिप यादवले समान १-१ विकेट लिए। यसअघि, ब्याटिङ गरेको भारतको लागि सन्जु सामसनले सर्वाधिक ५६ रन बनाए । उनले ४५ बलमा समान ३ चौका र ३छक्का प्रहार गरे। अक्षर पटेलले २६ र तिलक वर्माले २९ रन बनाउँदा हर्षित राना १३ रनमा अविजित रहे।
ओमानका लागि बलिङतर्फ शाह फैसल, जितेन रमानाण्डीले र अमिर कलिमले २-२ विकेट लिए। यो एसिया कप २०२५ को लिग चरणको अन्तिम खेल थियो। लिग चरणको खेल सकिएसँगै अब शीर्ष ४ को खेलहरू हुनेछन्।
शीर्ष ४ बीच राउन्ड रोबिनमा प्रतिस्पर्धा:
एसिया कप २०२५ को समूह चरणको खेल सकिँदा समूह एबाट भारत र पाकिस्तान, समूह बी बाट श्रीलङ्का र बङ्गलादेश शीर्ष ४ मा प्रवेश गरेका छन्।
अब यी टोलीहरूले राउन्ड रोबिनका आधारमा एकअर्कासँग खेल्नेछन्। सम्पूर्ण टोलीले एकअर्कासँग खेलिसकेपछि शीर्ष दुई टोलीले फाइनलमा स्थान बनाउनेछन्।
शीर्ष चारअन्तर्गतको पहिलो खेलमा समूह बीको विजेताको रुपमा रहेको श्रीलंका र उपविजेताको रुपमा रहेको बंगलादेशबीच हुनेछ।
आज सुपर फोरको पहिलो खेलको रुपमा बंगलादेश र श्रीलंकाले खेल्नेछन्। आइतबार समूह ए को विजेताको रूपमा रहेको भारत र उपविजेता पाकिस्तानले खेल्नेछन्।
