: नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले तत्कालीन सरकारले जेनजी आन्दोलनका क्रममा प्रदर्शनकारीलाई ताकिताकी गोली हान्ने आदेश नदिएको प्रस्ट पारेका छन्। आज संविधान दिवसको शुभकामना दिँदै उनले सरकारले प्रदर्शनकारीलाई गोली हान्ने आदेश नदिएको प्रस्ट पारेका हुन्। उनले प्रहरीसँग नभएका स्वचालित हतियारले गोली हानिएकोले घटनाको छानबिन हुनुपर्ने बताए।
उनले आह्वान कर्ताले भनेझैं गत साता जेन-जीको शान्तिपूर्ण हुने भनिएको प्रदर्शनका क्रममा घुसपैठ भएको बताए। ‘त्यसमा घुसपैठ गर्ने षड्यन्त्रकारीहरूले हिंसा मच्चाए। हाम्रा युवाहरुको ज्यान गयो। प्रहरीसँग नभएका स्वचालित हतियारले गोली हानेको घटनाको छानबिन हुनु पर्दछ। त्यस घटनाप्रति म फेरि दुःख व्यक्त गर्दै दिवंगत युवाहरूप्रति श्रद्धाञ्जली एवं घाइतेहरुको स्वास्थ्यलाभको कामना गर्दछु।’
सरकारले समयसीमा तोकेर नेपालमा दर्ता हुन दिएको समयावधि सकिएपछि बन्द गरिएका सामाजिक सञ्जालको सुचारु र भ्रष्टाचारको अन्त्यको माग गर्दै जेनजी पुस्ताका युवाहरूको समूहले काठमाडौंको माइतिघरदेखि बानेश्वर क्षेत्रमा प्रदर्शन गरेका थिए। प्रदर्शनका क्रममा भदौ २२ गते १९ जना प्रदर्शनकारीको ज्यान गएपछि ओलीले पदबाट राजीनामा दिएका थिए।
