: कतारले गाजाको नियन्त्रण कब्जा गर्न इजरायलको स्थल कारबाहीको निन्दा गरेको छ। कतारको विदेश मन्त्रालयले एक विज्ञप्ति जारी गर्दै गाजाको यो अभियानलाई भ्रातृ प्यालेस्टिनी जनता विरुद्धको युद्धको कार्य र नरसंहारको विस्तारको रुपमा लिएको जनाएको छ।
'इजरायलले गाजाको नियन्त्रण कब्जा गर्न सुरू गरेको ठूलो मात्रामा स्थल आक्रमणको कतारले कडा निन्दा गर्दछ। कतारले यसलाई भ्रातृ प्यालेस्टिनी जनता विरुद्धको युद्धको कार्य, नरसंहारको विस्तार र अन्तर्राष्ट्रिय कानुनको स्पष्ट उल्लङ्घन मान्दछ,' विज्ञप्तिमा भनिएको छ ।
कतारको विदेश मन्त्रालयले इजरायलले शान्तिको सम्भावनालाई कमजोर पार्न व्यवस्थित रूपमा काम गरिरहेको चेतावनी दिएको छ।
मन्त्रालयले यो अवस्थाले अन्तर्राष्ट्रिय शान्ति र सुरक्षामा खतरा निम्त्याउने र यसलाई रोक्न अन्तर्राष्ट्रिय ऐक्यबद्धता आवश्यक रहेको बताएको छ। कतारले फेरि एकपटक 'दुई राज्य समाधान' को लागि आह्वान गरेको छ।
इजरायलले गाजा शहरमा भारी बमबारी गरेको छ। इजरायली सेनाले गाजा शहर कब्जा गर्ने उद्देश्यले स्थलगत कारबाही सुरू गरेको बताएको छ। जसका कारण हजारौं परिवारहरू गाजा शहरबाट भागिरहेका छन्।
