– अमेरिकी राष्ट्रपति डोनाल्ड ट्रम्पले डालासमा भारतीय मूलका मोटेल म्यानेजर चन्द्र नागमल्लैयाको हत्यापछि अमेरिकामा गैरकानुनी रुपमा रहिरहेका आप्रवासीमाथि निशाना साँधेका छन् ।
उनले आफ्नो सामाजिक सञ्जाल ट्रथ सोशलमा लेखेका छन्, ‘टेक्सासको डालासमा चन्द्र नागमल्लैयाको हत्याको जानकारी पाएँ । उनी एक सम्मानित व्यक्ति थिए । उनकै पत्नी र छोराको अगाडि बर्बरतापूर्ण तरिकाले टाउको काटेर मारिएको छ ।’
उनले यस्तो अपराध गैर कानुनी रुपमा रहँदै आएका क्यूवाका नागरिकले गरेको पनि बताएका छन् । ‘ती व्यक्ति हाम्रो देशमा कहिल्यै पनि हुनुहुन्थेन । पहिला पनि ती व्यक्तिलाई गम्भीर अपराधका लागि पक्राउ गरिएको थियो’ ट्रम्पले भनेका छन् ।
साथै उनले अब गैरकानुनी रुपमा अमेरिकामा बसेका आप्रवासीमाथि नरम व्यवहार गर्ने समय सकिसकेको बताएका छन् । ‘मेरो टिमले अमेरिकालाई फेरि सुरक्षा बनाउनका लागि काम गरिरहेको छ,’ उनको भनाइ छ ।
गत साता टेक्सासको डाउनटाउन सुइट्स मोटेलमा ५० वर्षीय भारतीय मूलका चन्द्र नागमल्लैयाको हत्या गरिएको थियो । प्रहरीका अनुसार यो हत्या वाशिङ्ग मेसिनलाई लिएर भएको विवादपछि भएको हो ।
