क्याथे प्यासिफिक एयरवेजले हालको परिस्थितिका कारण काठमाडौंबाट भोलिदेखि हुने उडान अस्थायी रूपमा स्थगित गरेको छ।
एयरलाइन्सले त्रिभुवन अन्तर्राष्ट्रिय विमानस्थलका महाप्रबन्धकलाई पठाएको पत्र अनुसार फ्लाइट सीएक्स ६४० (हङकङ–काठमाडौं–हङकङ) १५ सेप्टेम्बरदेखि ३० सेप्टेम्बरसम्म सञ्चालनमा हुनेछैन। कम्पनीले १ अक्टोबर २०२५ देखि अवस्था समीक्षा गरी उडान पुनः संचालनमा आउने जनाएको छ। स्रोतका अनुसार, क्याथेका पाइलट र क्याबिनक्रू बास बस्ने होटल हयातमा आक्रमण भएको घटनापछि उडान स्थगन गर्ने निर्णय गरेको हो । ‘क्याथे आफ्ना कर्मचारीको हकहितमा ज्यादै संवेदनशील छ,’ स्रोत भन्छ, ‘अबको नेपालको शुरक्षाको अवस्था हेरेर मात्रै उसले उडानलाई निरन्तरता दिने/नदिने निर्णय लिने छ ।’ यात्रुहरूलाई अग्रिम रूपमा जानकारी दिइसकिएको छ र टिकट रिफन्ड, रूट परिवर्तन वा पछि बुकिङ गर्न सुविधा उपलब्ध गराइनेछ। एयरलाइन्सले यात्रुहरूलाई आवश्यक सहयोग गर्ने पनि जनाएको छ। यस निर्णयको सूचना विमानस्थल सुरक्षा, भन्सार, नागरिक उड्डयन, इमिग्रेसन र सम्बन्धित विभागहरूलाई पठाइएको छ। आन्दोलनअघि क्याथेले दैनिक हङकङ-काठमान्डौ-हङकङ उडान गर्दै आइरहेको थियो । नेपालका लागि पर्यटक ल्याउने मुख्य वायुसेवामा पर्ने क्याथे १९९७ देखि उडानमा छ । त्यसबेला यसले ड्रयागन एयरका नाममा उडान गरेको थियो । २००७ पछि क्याथेको नाममा उडान गर्दै आइरहेको छ ।
