: जेनजी आन्दोलनका क्रममा जनकपुरधाममा आगजनी, तोडफोड र लुटपाटमा संलग्न रहेको आरोपमा प्रहरीले ६ जनालाई पक्राउ गरेको हो।
धनुषा प्रहरीले भदौ २४ गते जेनजी पुस्ताको आन्दोलन तथा प्रदर्शनको क्रममा भएको आगजनी, तोडफोड र लुटपाटमा संलग्न ६ जनालाई पक्राउ गरेको धनुषा प्रहरी प्रमुख, प्रहरी उपरीक्षक नरहरि रेग्मीले जानकारी दिए।
प्रहरी प्रमुख रेग्मीका अनुसार घटनामा संलग्नहरूमा शहीदनगर नगरपालिका–३ का शिवम साह र जनकपुरधाम उपमहानगरपालिका-१३ का काले पटेल रहेका छन्। उनीहरूले प्रदेश लोकसेवा आयोगको कार्यालयमा गेट र सीसीटीभी तोडफोड गरेर गाडीमा आगजनी समेत गरेको आरोप छ। त्यहाँबाट प्रहरीले प्रयोग गर्ने केही हतियार पनि लुटेर फरार भएका थिए।
यस्तै, जनकपुरधाम–८ स्थित बलवा प्रहरी चौकीमा तोडफोड र आगजनीमा संलग्न निरोज मिश्र र कृष्ण यादव पक्राउ परेका छन्। मधेश प्रदेशका विभिन्न मन्त्रालय भित्र तोडफोड, आगजनी र लुटपाट गरी कम्प्युटर, प्रिन्टर लगायतका सामग्री चोरीमा संलग्न चन्दन कुमार साह र गौतम भगत पनि पक्राउ परेका छन्। उनीहरूको साथबाट २ थान कम्प्युटर र १ एक थान प्रिन्टर बरामद गरिएको प्रहरीले जनाएको छ।
पक्राउ परेकाहरू सबैलाई सार्वजनिक अपराध र सरकारी सम्पत्तिमा क्षति पुर्याएको आरोपमा अनुसन्धान अघि बढाइएको छ। एसपी रेग्मीका अनुसार थप संलग्न व्यक्तिहरूको खोजी कार्य जारी छ। साथै, धनुषा प्रहरीले सिन्धुली र महोत्तरीको जलेश्वर कारागारबाट फरार भएका १० जना नेपाली बन्दीहरूलाई पनि नियन्त्रणमा लिएको प्रहरी नायब उपरीक्षक बरुण बहादुर सिंहले २६ गतेदेखि आइतबारसम्म फरार कैदीहरू पक्राउ गरिएको जानकारी दिए।
