: ललितपुरस्थित नक्खु कारागार प्रशासनले फरार भएका कैदीबन्दीलाई सम्पर्कमा आउन अनुरोध गरेको छ। शुक्रबार सार्वजनिक सूचना जारी गर्दै कारागार प्रशासनले कारागार परिसरबाट फरार भएका सम्पूर्ण बन्दीहरू (थुनुवा र कैदी)लाई अविलम्ब उपस्थित भएर प्रचलित कानुनी प्रक्रिया तथा विधिको पूर्ण परिपालना गर्न अपिल गरेको हो।
अपिलमा भनिएको छ,ʻफरार अवस्थाको निरन्तरता रहँदा कानुनले तोकेको सजाय थप कडाइका साथ कार्यान्वयन गरिने मात्र नभई भविष्यमा प्राप्त हुन सक्ने कानुनी अधिकार, सुविधा तथा सामाजिक पुनर्स्थापना प्रक्रियामा समेत गम्भीर प्रतिकूल असर पर्न सक्ने भएकाले यस सम्बन्धमा सम्पूर्ण फरार कैदीबन्दीहरूलाई सचेत र सजग रहन स्मरण गराइन्छ।ʼ
कारागार प्रशासनले विधि, कानुन र सामाजिक उत्तरदायित्वप्रति सम्मान प्रकट गर्दै तुरुन्तै सम्पर्क गरी आत्मसमर्पण गर्न र सार्वजनिक शान्ति तथा सुव्यवस्था कायम गर्न अपिल गरेको छ।
ʻसाथै सम्पर्क हुन नआएका बन्दीलाई कारागार ऐन २०७९ र अन्य प्रचलित कानुन बमोजिम भई जाने व्यहोरा अवगत गराइन्छ,ʼसूचनामा भनिएको छ,ʻयस कारागार प्रशासनले सम्पर्कमा आउने व्यक्तिहरूको हकहितको रक्षा गर्दै प्रचलित कानुनी प्रावधानअनुसार उहाँहरूको पुनर्स्थापना प्रक्रियामा आवश्यक सहयोग र सहजीकरण उपलब्ध गराउने प्रतिबद्धता व्यक्त गर्दछौँ।ʼ
जेनजी प्रदर्शनको क्रममा भदौ २४ गते नक्खु कारागारबाट कैदीबन्दी भागेका थिए। नख्खु कारागारबाट निस्केका जनकपुर बम काण्डका आरोपी सञ्जय साह (टकला) पुनः कारागार नै फर्किएका छन्।
