: नवलपरासी कारागारबाट निस्किएका कैदीबन्दीहरू धमाधम फर्किन थालेका छन्। आज मध्याह्नसम्म ३३ जना कैदीबन्दी फर्किएका छन्।
जिल्ला प्रशासन कार्यालयले कारागारमा सृजना गरिएको अराजक स्थितिलाई नियन्त्रण गर्ने क्रममा निस्केका कैदीबन्दीहरू नफर्के कानुनअनुसार कारबाही गरिने जनाएपछि उनीहरू धमाधम फर्किन थालेका हुन्। ‘शुक्रबार मध्याह्नसम्म ३२ पुरुष र १ महिला फर्किएका छन्। ‘अरूले पनि आउने भन्दै सम्पर्क गरिरहेका छन्’, कारागार कार्यालयका प्रमुख विकल श्रेष्ठले भने।
कारागारमा रहेका ५७६ कैदीबन्दीमध्ये २९ जनाबाहेक सबै निस्केका थिए। बुधबार बाहिर निस्केकामध्ये केही अदालतको आदेशले छुटेका छन् भने कारागारमा अझै ५०९ जना कैदीबन्दी बाहिर छन्। जेनजी प्रदर्शनका क्रममा कैदीबन्दीहरूले कारागारमा आगजनी र सुरक्षार्थ खटिएकामध्ये ४ सशस्त्र र २ नेपाल प्रहरीका सुरक्षाकर्मीलाई नियन्त्रणमा लिई कारागार कब्जामा लिएर बाहिर निस्केका थिए।
साँझ ६ बजेसम्म निषेधाज्ञा त्यसपछि कर्फ्यु
नवलपरासीमा जारी गरिएको अनिश्चितकालीन कर्फ्यु आदेश बिहिबारदेखि खुकुलो बनाइएको छ। हिजो जस्तै आज पनि साँझ ६ बजेसम्मका लागि निषेधाज्ञा र साँझ ६ बजेदेखि भोलि बिहान ६ बजेसम्म कर्फ्यु लगाइएको छ।
निषेधाज्ञा र कर्फ्यु समयमा अत्यावश्यक सेवाका संस्था र पसलहरू खोल्न सकिने छ। अत्यावश्यक कामका लागि सवारी साधन सञ्चालन गर्न सकिने छ। ती सबै सेवा प्रदान र सेवा उपभोगका लागि नजिकको सुरक्षाकर्मीसँग समन्वय गर्न भनिएको छ।
