: कतारको राजधानी दोहामा इजरायली हवाई आक्रमणमा प्यालेस्टिनी सशस्त्र समूह हमासका पाँच सदस्यको मृत्यु भएको छ। तर हमासले आफ्नो वार्ता टोलीलाई लक्षित गरिएको हत्या प्रयास असफल भएको दाबी गरेको छ।
अमेरिकी प्रस्तावमा छलफल भइरहेको बेला दोहाको एक आवासीय भवनमा शक्तिशाली विस्फोट भएको हमासले जनाएको छ।
हमासले एक विज्ञप्तिमा भनेको छ,शत्रुले वार्ता प्रतिनिधिमण्डलका हाम्रा भाइहरूको हत्या गर्ने असफल प्रयास गरेको हामी पुष्टि गर्छौं।
मारिएका पाँच सदस्यमा खलील अल–हयाका छोरा हुमाम र हयाको कार्यालयका निर्देशक जिहाद लब्बाड पनि छन्।
इजरायली सेनालाई समर्थन गरेकाले अमेरिकी प्रशासनलाई आक्रमणको लागि संयुक्त रूपमा जिम्मेवार ठहराएको हमासले बताएको छ।
इजरायली प्रधानमन्त्री बेन्जामिन नेतान्याहूले आक्रमण पूर्ण रूपमा जायज भएको बताए।
कतारले इजरायली आक्रमणको निन्दा गर्दै यसलाई कायरतापूर्ण र अन्तर्राष्ट्रिय कानूनको स्पष्ट उल्लङ्घन भनेको छ।
यस्तै अमेरिकी राष्ट्रपति डोनाल्ड ट्रम्पले कतारको राजधानी दोहामा हमास नेताहरूमाथि इजरायली आक्रमणबाट आफू धेरै खुसी नभएको बताएका छन्।
