। कलाकार प्रकाश सपुतले यहाँस्थित नेपाली राजदूत शंकर शर्मा र दूतावासका सांस्कृतिक विभाग हेर्ने अधिकारी गोकुल बस्नेतसँग भेट गरेका छन् ।
राजदूत शर्मासँगको भेटमा सपुतले नेपाली फिल्मलाई स्वदेशसँगै भारतमा पनि एकसाथ प्रदर्शनमा ल्याउने व्यवस्थामा सहजीकरण गर्न आग्रह गरेका थिए ।
‘भारतमा नेपालीको संख्या ठूलो छ, यहाँ आएर कार्यक्रम गर्दा हजारौं नेपाली दर्शकको अपार सहभागिता र माया पाएँ, तर नेपाली चलचित्र अहिले पनि भारतमा प्रदर्शन गर्न जटिलता छ’ भेटमा सपुतले भने ।
‘जापान, युरोप, अमेरिका, मध्यपूर्व लगायतका देशमा जसरी नेपाली फिल्मको प्रदर्शन गरिएको छ, सोही शैलीमा भारतमा पनि फिल्म रिलिजको वातावरण गराउन उनले आग्रह गरेका हुन् ।
‘लाखौं नेपाली समुदाय भएकाले नेपाली चलचित्र प्रदर्शनको व्यवस्था हुन सक्यो भने नेपाली चलचित्रको दायरा अझ फराकिलो बन्नेछ’ उनले भने, ‘प्रवासी नेपालीले पनि आफ्नो देशको चलचित्र हेर्ने अवसर पाउनेछन् ।’
भेटका क्रममा दूतावासका अधिकारी बस्नेतले यो विषय अहिले आएर ध्यानाकर्षण भएको बताए । ‘अहिले दुई देशबीच सांस्कृतिक सम्झौता गर्ने चरणमा पनि छौं । त्यो पारित भयो भने संस्कृति कसरी आदान प्रदान गर्ने भन्ने त्यसमा समावेश छ । यस विषयलाई उच्च प्राथमिकतामा राखेर आवश्यक पहल र प्रक्रिया अघि बढाउने छौ,’ बस्नेतले भने ।
सपुत निर्देशित फिल्म ‘वसन्त’लाई भारतमा प्रदर्शनको तयारी गरिएको जनाइएको छ । यद्यपि, यसको मिति भने तय हुन बाँकी छ ।
योगगुरु रामदेव र बालकृष्ण आचार्यको संरक्षणमा रहेको हाम्रो स्वाभिमान ट्रष्टले हरितालिका तीजका अवसरमा आयोजना गरेको विशेष सांगीतिक कार्यक्रमका लागि जापानको कार्यक्रम सकेर सपुत दिल्ली पुगेका थिए ।
