— गर्भपतन गराएको अभियोगमा पक्राउ परेकामध्ये एक महिला कारागार चलान भएकी छन् । औषधि सेवन गरी १७ हप्ताको गर्भपतन गरेको अभियोगमा पक्राउ परेकी दिक्तेल रूपाकोट मझुवागढी नगरपालिका–४ खाल्लेकी २१ वर्षीया महिला सोमबार कारागार चलान भएकी हुन् ।
जिल्ला अदालतका निमित्त श्रेष्तेदार बाबुराम बस्नेतको सोमबारको निर्णयले दुई लाख धरौटी मागेकोमा बुझाउन नसक्दा कारागार चलान भएकी हुन् । त्यसै मुद्दामा उनीसँगै पक्राउ गरेका दिक्तेल रूपाकोट मझुवागढी-४ खाल्लेकै २३ वर्षीय पुरुष र ४० वर्षीया महिलाले जनही दुई लाख धरौटी बुझाएर छुटेका छन् । उक्त मुद्दामै पक्राउ परेको दिक्तेलस्थित एक मेडिकल व्यवसायी पनि एक लाख ५० हजार धरौटी बुझाएर छुटेका छन् ।
साउन ३० गतेको न्याय परिषद्को निर्णयले न्यायाधीश नारायणप्रसाद दाहाललाई भोजपुर सरुवा गरेपछि न्यायाधीश नहुँदा पुनर्विचार हुने गरी बस्नेतले निर्णय गरेका हुन् । उनीहरूमध्ये तीन जनालाई साउन २३ र मेडिकल व्यवसायीलाई २९ मा पक्राउ गरी गर्भ संरक्षणविरुद्धको कसुरमा मुद्दा चलाइएको जिल्ला प्रहरी कार्यालय खोटाङका सूचना अधिकारी प्रहरी निरीक्षक सुशान्त मिश्रले बताएका छन् ।
