— ध्रुवबहादुर प्रधानको संयोजकत्वमा गठित नेपाल ओलम्पिक कमिटी (एनओसी) को तदर्थ समितिले बिहीबार पत्रकार सम्मेलन गर्दै भनेको छ, आफूहरूको उद्देश्य ओलम्पिक विवाद समाधान गर्ने नै हो ।
त्यति मात्र होइन, अन्तर्राष्ट्रिय ओलम्पिक कमिटी (आईओसी) को समर्थन आफ्नै पक्षमा हुने दाबीसमेत गरे । एनओसीका पूर्वअध्यक्षसमेत रहेका प्रधानले भने, ‘म अध्यक्ष हुन आएको होइन, समस्या समाधान गर्न आएको हुँ ।’
यसक्रममा तदर्थ समितिले आफ्नो भाबी कार्यक्रम पनि प्रस्तुत गरेको छ । यसै साता सरकारले सातदोबाटोस्थित एनओसी भवन लगाएको ताला खोलिदिएपछि तदर्थ समिति त्यसमा प्रवेश गरेर पत्रकार सम्मेलन गरेको हो । सुरुमा तदर्थ समितिका प्रवक्ताका रूपमा समिममियाँ अन्सारी अगाडि आएका छन् । ९ सदस्यीय समितिका सदस्यको नाम पनि सार्वजनिक गरिएको छ ।
संयोजकमा नेपाल जिम्न्यास्टिक संघका अध्यक्ष प्रधान नै छन् । अन्य सदस्यमा कुस्तीका अन्सारीसँगै एथलेटिक्सका राजीवविक्रम शाह, फेन्सिङका सुनिल श्रेष्ठ, ट्रायथलनका निलेन्द्रराज श्रेष्ठ, सुटिङका पुष्पदास श्रेष्ठ, हक्कीका अनिल शर्मा, टेबलटेनिसका वृजेन्द्र हमाल र घोडचढी संघका रवि राजकर्णिकार छन् । अन्सारीबाहेक सबै संघका अध्यक्ष हुन् । एनओसीसँग आवद्ध २३ भन्दा बढी संघ मिलेर नै तदर्थ समिति बनाइएको दाबी गरिएको छ ।
संयोजक प्रधानले यो सरकारी हस्तक्षेप नभएर संघहरू मिलेर नै गरेको काम भएको दाबी गरे । उनले अहिले चलिरहेको ओलम्पिक विवादको मुख्य केन्द्र अन्तर्राष्ट्रिय मान्यताप्राप्त एनओसी अध्यक्ष जीवनराम श्रेष्ठ भएको पनि बताए । प्रधानले भने, ‘विधि, मूल्य र मान्यता मिचिएको छ । स्वेच्छाचारिता हाबी भएको छ । त्यसैले नयाँ तरिकाले अगाडि बढ्न संयोजक पद स्वीकारेको हुँ ।’
उनले थपे, ‘मलाई थाहा छ, मलाई गाली गर्ने धेरै हुनेछन् । तर पनि म अगाडि आएको छु ।’ प्रधानले अब विधानअनुसार साधारणसभा बोलाएर एनओसीको नयाँ नेतृत्व चयन गर्ने बताए । प्रवक्ता अन्सारीद्वारा जारी विज्ञप्तिमा भनिएको छ, ‘जीवनराम श्रेष्ठ नेतृत्वमा रहेको कार्यसमितिको चार वर्षे कार्यकाल ०८० को भदौ १९ मा सकिएको थियो । तर कार्यकाल सकिएपछि पनि आवधिक निर्वाचन गरेनन् ।’
अगाडि भनिएको छ, ‘त्यसपछि मात्र एक वर्ष र तीन महिना कार्यकाल थपे, यो विधानअनुसार छैन । श्रेष्ठले अवैधानिक रूपमा आफ्नो कार्यकाल बढाएका छन् । ओलम्पिक कमिटी विधानको कतिपय धारा मिचिएको छ ।’ तदर्थ समितिले जापानमा हुने एसियाली खेलकुदमा नेपालको सहभागिता सुनिश्चित गर्न राष्ट्रिय खेलकुद परिषद् र संघहरूसँग समन्वय गरेर खेलाडी छनोट प्रक्रिया अगाडि बढाउने जनाएको छ ।
