— अमेरिकामा अवैध रूपमा बसोबास गर्नेहरूको संख्या हालसम्मकै उच्च रहेको प्यु रिसर्च सेन्टर (पीआरसी) ले जनाएको छ । पीआरसीले बिहीबार सार्वजनिक गरेको तथ्यांकअनुसार, २०२३ मा उक्त संख्या १ करोड ४० लाख पुगेको छ । जुन २०२२ को भन्दा २२ लाखले बढी हो ।
यसअघि २००७ मा अवैध आप्रवासीको संख्या १ करोड २२ लाखसम्म पुगेको पीआरसीको रिपोर्टमा उल्लेख छ । पछिल्लो समय आप्रवासीको संख्यामा उल्लेख्य वृद्धि हुनुमा पछिल्लो समय झन्डै ६० लाख जना कुनै न कुनै प्रकारको कानुनी संरक्षणमा अमेरिका जानुलाई मानिएको छ । तर, राष्ट्रपति डोनाल्ड ट्रम्पले गत जनवरीमा पदभार सम्हालेपछि भने उनी अवैध आप्रवासीप्रति निर्मम हुँदै धेरैजसो यस्ता संरक्षणका प्रावधानहरू हटाएका छन् ।
पीआरसीको प्रतिवेदनले २०२४ मा पनि अवैध आप्रवासीको संख्या बढेको प्रारम्भिक तथ्यांक देखाएको छ, यद्यपि तत्कालीन राष्ट्रपति जो बाइडेनले गत जुनमा सीमामा शरण नीतिलाई कडा गरेपछि वृद्धिदर सुस्त भएको थियो । अमेरिकामा मेक्सिकोपछि ग्वाटेमाला, एल साल्भाडोर र भारतबाट सबैभन्दा धेरै अवैध आप्रवासी बसोबास गर्दै आएका छन् ।
भेनेजुएला, क्युबा, कोलम्बिया, निकारागुआ, इक्वेडर, युक्रेन र पेरुबाट आएकाहरूको संख्या पछिल्लो दुई वर्षमा दोब्बरभन्दा बढी भएको बताइएको छ । राष्ट्रपति ट्रम्पले गत मार्चमा संसद्मा दिएको सम्बोधनमा पनि विगत चार वर्षमा २ करोड १० लाख मानिस अमेरिका भित्रिएको दाबी गरेका थिए । ‘फेडेरेसन फर अमेरिकन इमिग्रेसन रिफर्म’ ले पनि मार्चमा १ करोड ८६ लाख आप्रवासी रहेको अनुमान गरेको थियो ।
आप्रवासन नियन्त्रणको पक्षमा रहेको ‘सेन्टर फर इमिग्रेसन स्टडिज’ ले गत महिना १ करोड ४२ लाख अवैध आप्रवासी रहेको उल्लेख गर्दै गत जनवरीमा १ करोड ५८ लाखको उच्च बिन्दुबाट घटेको उल्लेख गरेको छ । गृह सुरक्षा सचिव क्रिस्टी नोमले पछिल्लो ६ महिनामा १६ लाखले कमी आएको दाबी गर्दै यसलाई ‘ठूलो उपलब्धि’ भनेकी छन् । गृह सुरक्षा विभागको कार्यालयले २०२२ मा १ करोड १० लाख अवैध आप्रवासी रहेको अनुमान गरेको थियो भने ‘सेन्टर फर माइग्रेसन स्टडिज’ ले १ करोड २२ लाखको तथ्यांक पेस गरेको थियो ।
२०२३ मा अवैध आप्रवासीमध्ये सबैभन्दा ठूलो संख्यामा ४३ लाख मेक्सिकन रहेको बताइएको छ भने अन्य देशहरूबाट आएकाहरूको संख्या ९७ लाख छ । क्यालिफोर्निया, टेक्सास, फ्लोरिडा, न्युयोर्क, न्युजर्सी र इलिनोइसमा अवैध आप्रवासीको संख्या सबैभन्दा धेरै छ । एरिजोना, क्यालिफोर्निया, नेभाडा, न्यु मेक्सिको, न्युयोर्क र ओरेगनमा २००७ को तुलनामा २०२३ मा अवैध आप्रवासीको संख्या कम रहेको तथ्यांकले जनाएको छ ।
