— नयाँ फरवार्डहरू लिन ठूलो खर्च गरे पनि म्यानचेस्टर युनाइटेड आइतबार इंग्लिस प्रिमियर लिगको आफ्नो पहिलो खेलमा आर्सनलसँग १–० ले पराजित भयो । यसले आर्सनलको उपाधि दाबेदारीलाई पनि प्रस्तुत गरेको छ ।
ओल्ड ट्राफोर्डमा रिकार्डो कालाफिओरीले खेलको एक मात्र गोल गरे । युनाइटेडका निमित्त गोलरक्षक एल्टे बायिन्दिरले गरेको गल्तीमा इटालियन रक्षकको फाइदा उठाउँदै गोल गरेका थिए । पछिल्ला तीन सिजनमा उपविजेता रहेको आर्सनलका व्यवस्थापक मिकेल आर्टेटामाथि २००३–०४ यता पहिलो लिग उपाधि दिलाउन ठूलो दबाब रहेको छ ।
युनाइटेडले फरवार्ड लाइन मजबुत बनाउन म्याथ्युज कुन्हा, ब्रायन एमबेउमो र बेन्जामिन सेस्कोलाई २० करोड पाउन्ड खर्च गरेर भित्र्याएको थियो । कुन्हा र एमबेउमोले राम्रो प्रभाव देखाए पनि गोल भने गर्न सकेनन् । सेस्को दोस्रो हाफमा मात्र मैदान प्रवेश गरेका थिए । युनाइटेडले गत सिजन ३८ प्रिमियर लिगमा केवल ४४ गोल मात्र गर्न सकेको थियो र टोली १५ औं स्थानमा रहेको थियो । ५१ वर्षयता युनाइटेडको त्यो सबैभन्दा कमजोर प्रदर्शन थियो ।
क्लब वर्ल्डकप विजेता चेल्सी पनि नयाँ सिजनको आफ्नो पहिलो खेलमै क्रिस्टल प्यालेसबाट गोलरहित बराबरीमा रोकिएको छ । स्टामफोर्ड ब्रिजमा एकै अंक मात्र बटुल्न सक्नु चेल्सीका लागि निराशाजनक सुरुवात रह्यो ।
आइतबारकै अर्को खेलमा पहिलो हाफमा सम्भव तीन गोलको मद्दतले नटिङघम फरेस्टले ब्रेन्टफोर्डलाई ३–१ ले पराजित गर्यो । त्यसमा फरेस्टका लागि क्रिस उडले दुई गोल गरे । उनले पाँचौं मिनेटमा गोलको खाता खोलेपछि डान एनडोयले ४२ औं मिनेटमा दोस्रो गोल थपे । पहिलो हाफको इन्ज्युरी समयको दोस्रो मिनेटमा उडले तेस्रो गोल गरे । ब्रेन्टफोर्डका तर्फबाट सम्भव एक मात्र गोल इगोर थिएगोको नाममा रह्यो । उनले ७८ औं मिनेटमा पेनाल्टीबाट गोल गरे तर यो सान्त्वना गोलभन्दा बढी हुन सकेन र फरेस्ट लिगमा उत्कृष्ट सुरुवात लिन सफल रह्यो ।
फरेस्टले सिजनको पहिलो लिग खेलमा जित निकालेको पनि यो २०१७–०१८ यता पहिलो पटक हो । अर्कोतर्फ ब्रेन्टफोर्डका नयाँ प्रशिक्षक केथ एन्ड्र्युले भने आफ्नो पहिलो जिम्मेवारीमा हार बेहोरेका छन् । यसअघि म्यानचेस्टर सिटीले उपाधिमा आफ्नो दाबेदारी प्रस्तुत गर्ने क्रममा शनिबार विजयी सुरुवात लिएको छ ।
उसले इर्लिङ हालान्डको दुई गोलको मद्दतले उल्भ्सलाई ४–० ले हराएको हो । सिटीका लागि टिजानी रेजिन्डर्स र रायन सेर्कीले १–१ गोल गरे ।
बार्सिलोनाका विजयी सुरुवात
म्याड्रिड : स्पेनी ला लिगामा डिफेन्डिङ च्याम्पियन बार्सिलोनाले शनिबार बलियो सुरुवात लिएको छ र यस क्रममा रियल मार्लोकामाथि ३–० को जित रचेको छ । ९ खेलाडीमा सीमित रहेको मार्लोकालाई बार्सिलोनाले उसकै घरमा हराएको हो । क्याटलान क्लबका लागि राफिन्हाले सातौं मिनेटमा गोलको खाता खोले ।
फेरान टोरेसले २३ औं मिनेटमा दोस्रो गोल थपे । लामिन यामलले दोस्रो हाफको इन्ज्युरी समयको चौथो मिनेटमा तेस्रो गोल गरे । बार्सिलोनाका लागि मार्कस रसफोर्डले औपचारिक रूपमा डेब्यु पनि गरेका छन् । अन्य खेलमा डेपोर्टिभो एलाभेसले लाभेन्टेलाई २–१ ले पराजित गर्यो भने भने भ्यालेन्सिया र रियल सोसिडाडबीचको खेल १–१ को बराबरीमा रोकियो ।
