: अमेरिकी विदेश मन्त्रालयले गाजाबाट आउने मानिसका लागि भिजिट भिसा बन्द गरेको छ।
मन्त्रालयले विरामको अस्थायी उपचार र मानवीय आधारमा निश्चित भिसा जारी गर्न आवश्यक प्रक्रियाको गहन समीक्षा गर्न भिजिट भिसा बन्द गरिएको जनाएको छ।
केही प्यालेस्टिनी अधिकार समूहले अमेरिकाको यो निर्णयको निन्दा गरेका छन्। प्यालेस्टिनी बाल राहत कोषले एक विज्ञप्ति जारी गर्दै भन्यो,ʻगाजाबाट घाइते र गम्भीर बिरामी बालबालिकाहरूलाई उपचारका लागि संयुक्त राज्य अमेरिका ल्याउने हाम्रो क्षमतामा गम्भीर असर पार्नेछ।ʼ
अति दक्षिणपन्थी कार्यकर्ता लौरा लुमरले एक्समा भिसा कार्यक्रमको आलोचना गर्दै केही पोस्ट गरेकी थिइन्। उनले ट्रम्प प्रशासनलाई गाजाबाट आउने मानिसका लागि भिजिट भिसा बन्द गर्न आग्रह गरेकी थिइन्। त्यसपछि अमेरिकी विदेश विभागको नीतिमा परिवर्तन भएको हो।
प्यालेस्टिनी बाल राहत कोषले आफ्नो विदेश उपचार कार्यक्रम अन्तर्गत २०२४ मा गाजाबाट १६९ बालबालिकालाई बाहिर निकालेको बताएको छ। यी बालबालिकालाई उपचारका लागि मध्य पूर्व, युरोप, दक्षिण अफ्रिका र अमेरिका लगिएको थियो।
७ अक्टोबर २०२३ मा हमासले इजरायलमा आक्रमण गरेदेखि करिब दुई वर्षदेखि चलिरहेको युद्धमा गाजाका अधिकांश अस्पताल ध्वस्त भएका छन्। यहाँका मानिसले खाद्यान्नको चरम अभावको सामना गरिरहेका छन्।
