: युक्रेनी राष्ट्रपति भोलोडिमिर जेलेन्स्कीले अमेरिकी राष्ट्रपति डोनाल्ड ट्रम्पसँगको आफ्नो कुराकानीबारेमा जानकारी दिएका छन्।
उनले युद्धविराम, युक्रेनी युद्धबन्दीहरूको रिहाइ र लडाइँ जारी रहेसम्म रुसमाथि दबाब जारी राख्न आह्वान गरेका छन्। उनले आफू रुससँग दिगो शान्तिको खोजीमा रहेको बताए।
ʻराष्ट्रपति ट्रम्पसँगको कुराकानीमा मैले त्रिपक्षीय बैठक भएन वा रुसले युद्धको इमानदार अन्त्यबाट बच्न खोज्यो भने रूसमाथि प्रतिबन्धहरू अझ कडा गरिनुपर्छ भनेको छ,ʼजेलेन्स्कीले भने।
उनले थप भने,ʻयुक्रेनका लागि महत्त्वपूर्ण सबै मुद्दा युक्रेनको उपस्थितिमा छलफल गरिनुपर्छ। विशेष गरी क्षेत्रहरूमाथिको अधिकारसँग सम्बन्धित कुनै पनि निर्णय युक्रेन बिना लिन सकिँदैन।ʼ
शुक्रबार अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनले अलास्कामा भेटवार्ता गरेका थिए। यो भेटवार्तापछि फर्कने क्रममा ट्रम्पले युक्रेनी राष्ट्रपति भोलोदिमिर जेलेन्स्कीसँग कुराकानी गरेका थिए। जेलेन्स्की सोमबार अमेरिकाको भ्रमणमा जानेछन्।
