। नेपाली कांग्रेसका सभापति शेरबहादुर देउवाले कांग्रेस सरकारमा हुँदा लागू भएका नीतिले सबै जनतालाई प्रविधिको पहुँचमा ल्याएको दाबी गरेका छन् । कांग्रेस सधैं नवप्रवर्तन र प्रविधिमार्फत रुपान्तरणको पक्षमा उभिँदै आएको उनको दाबी छ ।
नेपाली कांग्रेस सूचना, संचार तथा प्रचार विभागले बिहीबार ललितपुरको सानेपास्थित केन्द्रीय कार्यालयमा गरेको ‘डिजिटल प्लेटफर्मको प्रयोग, प्रभाव र असर’ विषयक एक दिने अन्तक्रिया कार्यक्रममा बोल्दै देउवाले जनतालाई केन्द्रमा राखेर उपलब्धि केन्द्रीत प्रविधि बनाउने पक्षमा उभिने बताए ।
उनले भने, ‘नेपाली कांग्रेस नेतृत्वको सरकारको अग्रसरतामा जारी भएका दूरसञ्चार सम्बन्धी नीति, एने र नियमहरूले आज नेपालका टाढाका बस्तीहरू र सबै नागरिकलाई प्रविधिको पहुँचमा ल्याएको छ, यसका अतिरिक्त प्रविधिको क्षेत्रमा धेरै कामहरू अझै गर्न बाँकी छ ।’
विभिन्न क्षेत्रमा डिजिटल प्लेटफर्महरूको प्रयोग बढेको भन्दै सभापति देउवाले प्रचलनमा रहेका सञ्जालहरूलाई शिक्षा, स्वास्थ्य, कृषि, पूर्वाधार, रोजगारी तथा सार्वजनिक सेवा प्रवाहमा जिम्मेवार प्रभावकारी रूपमा प्रयोग गर्न आवश्यक रहेको उनले बताए ।
साथै डिजिटल प्लेटफर्ममा देखिएका असुरक्षाका समस्या समाधानका लागि सरकार र सरोकारवालाले समयमै ध्यान दिनुपर्नेमा उनले जोड दिए ।
पार्टीको प्रचार विभागले गरेको कार्यक्रमले सबैलाई सचेत बनाउने र ठोस नीति निर्माणमा मार्गदर्शन गर्ने उनको विश्वास छ ।
