— नेपाल फुटबल खेलाडी संघले मंगलबार नेपाली फुटबललाई चलायमान राख्न डिभिजन फुटबल निरन्तरता दिन माग राख्दै अखिल नेपाल फुटबल संघ (एन्फा) का महासचिव किरण राईसमक्ष ज्ञापनपत्र बुझाएको छ ।
संघका अध्यक्ष विक्रम लामाको नेतृत्वमा विराज महर्जन, विकेश कुथुको टोलीले एन्फासामु ज्ञापनपत्र बुझाउँदै चाँडोभन्दा चाँडो सबै श्रेणीका सहभागी क्लबसँग समन्वय गरेर फुटबल लिग क्यालेन्डरअनुसार काम अघि बढाउन माग राखेको हो ।
खेल र खेलाडीको भविष्य सुरक्षित गर्न द्रुत कदम चाल्न एन्फालाई खेलाडी संघले अनुरोध गरेको छ । पछिल्लो ए डिभिजन लिग भएको दुई वर्षभन्दा बढी समय बितिसक्दा पनि अर्को सिजन सुरुआतबारे अझै पनि अन्योलता रहेको र नेपाली फुटबललाई चलायमान राख्न डिभिजन फुटबललाई निरन्तरता दिनुपर्ने मागसहित ज्ञापनपत्र बुझाएको अध्यक्ष लामाले बताएका छन् ।
‘निरन्तर अन्योलले खेलाडीहरू र हाम्रो देशभित्रको फुटबल समुदाय दुवैमा गम्भीर र प्रत्यक्ष असर पारेको छ । लिग फुटबलको अभावले खेलकुदमा आफ्नो जीवन समर्पित गरेका हाम्रा फुटबल खेलाडीहरूलाई अनिश्चित अवस्थामा पुर्याएको छ । हामीजस्तै प्रशिक्षक, रेफ्री र फुटबलकै भर गर्ने अन्य हजारौंको अवस्था पनि यस्तै होला । फुटबलको अभावकै कारण धेरै प्रतिभा जीविकोपार्जनको खोजीमा देश छोड्न बाध्य भएका छन् । यो पलायन केवल व्यक्तिगत प्रतिभाको क्षतिमात्र होइन, यसले राष्ट्रिय फुटबललाई दीर्घकालिन हाही पुर्याउँछ । अन्तर्राष्ट्रिय मञ्चमा पनि हाम्रो स्तरमा प्रत्यक्ष प्रभाव पार्दछ,’ संघको विज्ञप्तिमा भनिएको छ, ‘पछिल्लो पटक राष्ट्रिय टोली छनोट गर्न खेलाडी ट्रायलमा बोलाउनुपर्ने स्थितिले यसलाई अझ उजागर गरेको छ । राष्ट्रिय टोलीको छनोट प्रतिस्पर्धात्मक खेलबाट हुनुपर्ने हो । लिग गर्नुबाहेकको विकल्प हामीसँग छैन ।’
