: बेलायतमा ग्रेटर म्यानचेस्टर प्रहरीले पक्राउ गरेपछि पाकिस्तान क्रिकेट बोर्ड (पीसीबी)ले राष्ट्रिय टोलीका मध्यक्रमका ब्याट्सम्यान हैदर अलीलाई निलम्बन गरेको छ। तर, पछि उनले जमानत पनि पाएका छन्।
हैदर अलीले २०२० मा राष्ट्रिय क्रिकेट टोलीबाट डेब्यू गरेका थिए। त्यसयता उनले ३५ टी–२० अन्तर्राष्ट्रिय खेल र दुई एकदिवसीय खेलमा पाकिस्तानको प्रतिनिधित्व गरिसकेका छन्।
क्रिकेटर हैदर अलीबारे रोयटर्सलगायतका समाचार एजेन्सीले उनलाई एक महिलाको उजुरीमा म्यानचेस्टर प्रहरीले हिरासतमा लिएको जनाएका छन्।
प्रहरीका अनुसार पक्राउ परेका हैदर अलीलाई थप अनुसन्धान नभएसम्म जमानत दिइएको छ।
यद्यपि, अनुसन्धान पूरा नभएसम्म उनी बेलायत छोड्न पाउने छैनन्।
पाकिस्तान क्रिकेट बोर्डले बिहीबार राति क्रिकेटर हैदर अलीको म्यानचेस्टर प्रहरीले हिरासतमा लिएको सम्बन्धमा एक विज्ञप्ति जारी गरेको छ।
विज्ञप्तिमा पीसीबीलाई क्रिकेटर हैदर अलीविरुद्ध ग्रेटर म्यानचेस्टर प्रहरीले गरिरहेको आपराधिक अनुसन्धानबारेमा जानकारी गराइएको भनिएको छ।
पीसीबीको विज्ञप्ति अनुसार अनुसन्धान पाकिस्तान शाहिन्सको हालैको इङ्गल्याण्ड भ्रमणका क्रममा भएको घटनासँग सम्बन्धित छ।
पीसीबीले ग्रेटर म्यानचेस्टर प्रहरीले हैदर अलीमाथि अनुसन्धान गरिरहेको र राष्ट्रिय क्रिकेटरलाई पीसीबीले कानुनी सहयोग दिएको भनेको छ।
पीसीबीले विज्ञप्तिमा भनेको छ, ‘पीसीबीले बेलायतको कानुनी प्रक्रियाको पूर्ण सम्मान गर्दछ र यसको महत्त्वलाई स्वीकार गर्दछ। पीसीबीले हैदर अलीलाई तत्काल प्रभावबाट निलम्बन गर्ने निर्णय गरेको छ।’
‘कानुनी प्रक्रिया पूरा भएपछि र सबै तथ्यहरू प्रकाशमा आएपछि, पीसीबीले आफ्नो आचारसंहिता अन्तर्गत उपयुक्त कारबाही गर्ने अधिकार सुरक्षित राख्छ। कानुनी प्रक्रिया पूरा नभएसम्म पीसीबीले यस विषयमा थप कुनै टिप्पणी गर्ने छैन,’ विज्ञप्तिमा भनिएको छ।
हैदर अली पक्राउ परेपछि पाकिस्तानी क्रिकेट प्रशंसकहरूले सामाजिक सञ्जालमा तिखो प्रतिक्रिया दिएका छन्।
