: नेपाली राष्ट्रिय पुरुष क्रिकेट टोलीका खेलाडीहरूको फिटनेस तथा फिजिकल टेस्ट गरिएको छ। नेपाल क्रिकेट संघ (क्यान) र राष्ट्रिय खेलकुद खेलकुद (राखेप)को समन्वयमा ललितपुरको सातदोबाटोस्थित स्पोर्टस साइन्स एण्ड रिसर्च सेन्टर एण्ड हाइ पर्फमेन्स सेन्टरमा राष्ट्रिय पुरुष क्रिकेट टोलीका खेलाडीहरूको फिटनेस तथा फिजिकल टेस्ट गरिएको हो।
फिटनेस तथा फिजिकल टेस्टमा राष्ट्रिय टिमका मुख्य प्रशिक्षक, फिजियोलगायत उपस्थित थिए। फिटनेस तथा फिजिकल टेस्टको नतिजाका बारेमा टिममा छलफल हुने नेपाल क्रिकेट संघ (क्यान)का सचिव पारस खड्काले जानकारी दिए।
खड्काले हाइ पर्फमेन्स सेन्टरमा फिटनेस तथा फिजिकल टेस्टका लागि सम्पूर्ण उपकरण रहेकाले सहज भएको बताए। अरु खेल संघहरूले पनि हाइ पर्फमेन्स सेन्टरको सदुपयोग गरेर खेलाडीको फिटनेसमा ध्यान दिनुपर्ने उनले सुझाव दिए।
त्यस्तै राखेप सदस्य सचिव टंकलाल घिसिङले नेपाली खेलाडीको प्रशिक्षणस्तर उकास्ने उद्देश्यले बनाइएको हाइ पर्फमेन्स सेन्टरको सबैले सदुपयोग गर्नुपर्नेमा जोड दिए। उनले आगामी दिनमा यसलाई थप सुविधासम्पन्न बनाउन सबैले ध्यान दिनुपर्ने उल्लेख गरे। फिटनेस तथा फिजिकल प्ररीक्षणको नतिजाले खेलाडी र सम्पूर्ण टिमलाई बलियो बनाउने मद्धत पुग्ने उनको विश्वास छ।
नेपाली राष्ट्रिय पुरुष क्रिकेट टोली केही दिनमा टप एण्ड टी-२० सिरिज खेल्न अस्ट्रेलिया प्रस्थान गर्दैछ। अक्टोबरमा ओमानमा हुने आइसिसी पुरुष टी-२० विश्वकपको एसिया तथा पूर्वी एसिया-प्रशान्त क्षेत्रको संयुक्त छनोट प्रतियोगिताको तयारीका लागि अस्ट्रेलिया भ्रमण गर्न लागेको हो।
