: बार्सिलोना फुटबल क्लबले जर्मन गोलकिपर मार्क–आन्द्रे टर स्टेगनमाथि अनुशासनात्मक कारबाही गरेको छ। क्लबले उनको क्लब कप्तानी खोसिएको घोषणा गरेको हो।
३३ वर्षीय टर स्टेगनले अन्तिमपटक जर्मनीका लागि जुन महिनामा खेलेका थिए। उनले जुलाईको अन्त्यमा ढाडको शल्यक्रिया गराएका थिए।
प्राप्त समाचारअनुसार टर स्टेगन र क्लबबीचको विवाद मेडिकल जानकारी ला लिगासँग नभनेपछि चर्किएको हो।
टर स्टेगनले केही समयअघि सामाजिक सञ्जालमार्फत आफू तीन महिनाका लागि खेल बाहिर रहने जानकारी दिएका थिए। तर ला लिगाको नियम अनुसार कुनै खेलाडीलाई लामो समय अनुपस्थित मान्नका लागि कम्तीमा चार महिना मैदानबाहिर रहनुपर्ने हुन्छ।
ला लिगा च्याम्पियन बार्सिलोनाले यो सिजनमा नयाँ खेलाडी अनुबन्ध गरेको छ।
बार्सिलोनाले भनेको छ, ‘अनुशासनात्मक प्रक्रिया पूरा नभएसम्म टर स्टेगनको कप्तानी हटाइएको छ र हाल उप–कप्तान रहेका रोनाल्ड अराउजोलाई कप्तानीको जिम्मेवारी दिइनेछ।’
२०१४ मा बोरुसिया मोन्शेनग्लाडबाखबाट बार्सिलोनामा आबद्ध भएका टर स्टेगनले क्लबका लागि ४०० भन्दा बढी खेल खेलिसकेका छन्। उनले बार्सिलोनासँग एक पटक च्याम्पियन्स लिग र ६ पटक ला लिगा उपाधि जितेका छन्।
